Bautista, Marbun mag-abot karon sa pre-fight news conference

CEBU, Philippines - Magkita sa labing unang higayon ang mga protagonista sa “Hamon sa Kampeon” fight card nga gipangulohan ni Rey 'Boom Boom' Bautista sa ALA Stable ug ni Indonesian champion Marangin 'Dinamita' Marbun sa ilang pre-fight news conference karong adlawa diha sa Aegean room sa Waterfront-Cebu City Hotel and Casino sa Lahug, ning siyudad.

Si Bautista (26-2, 19KOs) makigsangka ni Marbun (19-5-1, 7KOs) sa ilang 12-rounder bout alang sa interim WBC International featherweight title.

Ang 22-anyos nga si Bautista, kinsa katapusang ni-away niadtong Nobiyembre 22, 2008 diin napilde siya ngadto sa Mehikanong si Heriberto Ruiz pinaagi sa unanimous decision didto sa MGM Grand Garden Arena sa Las Vegas, Nevada.

Si Bautista mipahulay human sa operasyon sa iyang kamot nga na-injured.

Aron masukod kun aduna pa ba siya’y ikabuga, sangkaon ni Bautista ang usa ka delikadong boksidor nga si Marbun, kinsa midaog sa tanan sa iyang katapusang walo ka away ug kausa lang kini natumba sa 25 niya ka mga sangka.

Gawas ni Bautista, mopakita usab sa ilang katakus sa undercard ang duha ka ALA fighters nga sila si Jason Pagara ug Czar Amonsot ning maong promosyon nga hiniusang gipasiugdahan sa ALA Promotions ug sa higanteng television network ABS-CBN.

Si Pagara (18-1, 10KOs) makigbinukbukay ni Decha Bankluaygym (29-9-3, 16KOs) sa Thailand, samtang si Amonsot (19-3-1, 11KOs) makigsinukliay og kumo batok ni WBO Asia Pacific lightweight champion Jesus Muzaka (16-7, 8KOs).

Usa usab ka lisud nga tahas ang sagubangon ni Marjun Yap (11-2, 5KOs) sa Cagayan de Oro City sa iyang pakigsangka batok ni WBO Asia Pacific champion Pramuansak Posuwan (45-3-1, 24 KOs) sa nabantog nga Kokietgym didto sa Thailand.

Ang mga tiket mapalit sa P1,500 alang sa VIP 1st Row, P1,250 sa VIP 2nd Row, P1,000 sa VIP 3rd Row, P500 sa ringside ug P250 alang sa ballroom ug balcony.

Niadtong buot magpareserba og tiket, tawag lang sa ALA Promotions office (2364611), ALA Gym sa Banilad Town Center (4162011) ug Waterfront Cebu City Hotel and Casino (2326888).   (BANATNEWS)