"Boom Boom" moatubang laing hagit

CEBU, Philippines - Maihap na lang ang adlaw ug sa dili madugay sukdon na usab ang abilidad ni Rey 'Boom Boom' Bautista kun aduna pa ba siya’y kapabilidad sa pagkulit og daog sa iyang pagbalik og katkat ibabaw sa ring batok ni Indonesian champion Marangin 'Dinamita' Marbun diha sa Waterfront-Cebu City Hotel and Casino sa Lahug, ning siyudad.

Si Bautista, kinsa nawala sa eksena sa boksing sud sa usa ka tuig moatubang og laing hagit batok ni Marbun, kinsa midaog sa katapusang walo niya ka away, alang sa interim WBC International featherweight championship.

Masukod usab ang kusog ni Bautista kun mapatumba ba niya ang Indonesian fighter, kinsa gihulagway nga usa ka lig-on nga boksidor.

Si Marbun, kausa pa lang nasukarap sulod sa 25 niya ka mga away.

Gawas ni Bautista, laing duha ka ALA boys nga mopakita og aksiyon sa undercard sa “Hamon sa Kampeon” mao sila si Jason Pagara (18-1,10KOs) ug Czar Amonsot (19-3-1, 11KOs).

Ang 19-anyos nga si Pagara makigsinukliay og kumo batok ni Decha Bangluaygym sa Thailand, samtang ang Boholanong si Amonsot mosukod sa abilidad ni WBO Asia Pacific lightweight titlist Jesus Muzaka sa Democratic Republic of Congo.

Mokompleto sa undercard mao si Marjun Yap sa Cagayan de Oro City batok ni   world rated- WBO Asia Pacific champion Pramuansak Posuwan sa Thailand.

Ang mga tiket nagkantidad og P1,500 alang sa VIP 1st Row, P1,250 sa VIP 2nd Row, P1,000 sa VIP 3rd Row, P500 sa ringside ug P250 alang sa ballroom ug balcony.

Niadtong buot magpareserba og tiket, tawag lang sa ALA Promotions office (2364611), ALA Gym sa Banilad Town Center (4162011) ug Waterfront Cebu City Hotel and Casino (2326888).   (BANATNEWS)