Ornopia, duha ka anak midaog korona sa 13th leg MS Motosuit moto-x series

CEBU, Philippines - Mabungahon ang adlaw ni reigning "Rider of the Year" Seigfred Ornopia ug ingon man sa iyang duha ka mga anak dihang mihakot sila og titulo sa 13th leg sa 2009 MS Motosuit Motocross Series nga giulohan og "Enan Mendiola Chiong Memorial Motocross Competition" niadtong Sabado didto sa lungsod sa Naga sa habagatang bahin sa lalawigan sa Sugbu.

Ang walay pagbahar nga si Ornopia, subli na sab nga mipakita sa iyang katakus ug milampos kini sa pagsungasong   sa mga lisud nga hagit aron paghari sa executive A title. Napuhalan niya ang abilidad ni event organizer Nonoy Reluya ug Gener Sicad, nga mi-okupar sa ikaduha ug ikatulo nga dapit.

Wala sab magpaperi ang duha ka anak ni Ornopia nga sila si Earl Jean Brylle ug Ken Kerry nga mao sab ang nidominar sa ilang tagsa-tagsa ka dibisyon.

Si Brylle, kinsa hinay-hinay nga misunod sa tunob sa iyang amahan naghari sa mini class category. Gisundan siya ni Vinz Batulan ug Ken Kerry Ornopia.

Wala sab hinuon magmahay si Ken Kerry kay nakadala sab siya og titulo human niya gidominar ang pewee class. Nalupigan sa iyang abilidad si Jose Karl Enriquez ug Vinz Batulan nga mipahiluna sa ikaduha ug ikatulo nga dapit. Si Kerry Keizer Ornopia mipahiluna sa ikaupat, samtang si BJ Pepito mikapyot sa ikalima nga dapit.

Gipilde niya silang Jose Karl Enriquez, Vinz Batulan, Kerry Keizer Ornopia ug BJ Pepito.

Bulahan usab ang adlaw ni Jon-Jon Adlawan human kini makapakita sa iyang impresibong performance sa maong lumba.

Si Adlawan, kinsa napakyas pagdaog og titulo sa 12th leg didto sa Daanbantayan mipukan sa managsuong Jubenille ug Giovanni Abellar aron langkaton ang korona sa premiere expert open ning maong lumba nga gipaluyohan sa Castrol Power 1. Si Jubenille nalandig sa ikaduha, samtang si Giovanni napunta sa ikatulo.

Nakabitbit sab hinuon si Jubenille og korona dihang iyang gidominar ang intermediate pinaagi sa pagpukan nilang John Flores ug Rex Barbaso, kinsa mipahiluna sa ikaduha ug ikatulo nga dapit.

Mahinungdanon sab ang adlaw alang kang Dongkey Sanchez kay midaog kini og duha ka kampiyonato pinaagi sa local enduro ug beginner's open production. Nakakuha sab siya og runner-up trophy sa novice enduro nga nadaog ni Ayen Ledesma.

Gipukan ni Sanchez si Ray Querol sa local enduro, samtang si Boni Bustillo natugpa sa ikatulo. Iyang gipukan silang Ledesma ug Andrew Canlas sa beginner's open production.

Sa executive-B, si Sicad mao sab ang nanghawod human niya gipilde silang Jet Oliveros ug Reluya, samtang si Atty. Allan Ranillo mao sab ang nidominar sa executive-C gisundan ni Atty. Flint Concha ug Jetjet Oliveros nga mi-okupar sa ikaduha ug ikatulo nga dapit.   (BANATNEWS)