CEBU, Philippines - Human sa makalingaw nga All-Star Game, lain na sab nga duwa ang tutokan sa mga mahiligon sa basketbol dihang magtiwas ang 4th seed University of San Carlos (USC) Warriors ug 5th seed Southwestern University (SWU) Cobras nga pulos piang nga moduwa karon alang sa bakanteng luna sa semifinals sa 9th Cebu Schools Athletic Foundation, Inc. (CESAFI) diha sa Cebu Coliseum.
Ang tinaktakay sa USC ug SWU gikatakda sa alas-6 sa gabii human sa Game-1 sa "best-of-three" semifinal sa secondary division tali sa top seed University of Cebu (UC) Junior Webmasters ug sa No. 4 University of San Jose-Recoletos (USJ-R) Baby Jaguars.
Ang modaog sa Warriors-Cobras playoff maoy moharong sa UC Webmasters sa sunod hugna.
Nabuntog na sa Warriors ang Cobras niadtong Oktubre 4, 88-72, apan si CESAFI commissioner Felix O. Tiukinhoy Jr. mi-forfeit sa ilang kadaugan pabor sa SWU human madiskobrehi nga ang Warrior point guard nga si Paul Norman Joven miduwa og laing liga gawas sa CESAFI nga usa ka dakung kalapasan sa Section 6 sa Article A sa player’s eligibility nga naglatid: “no player is allowed to play in any tournament or commercial league while the CESAFI season is not yet over.”
Gumikan niini, si Tiukinhoy mimando og tinaktakay nga duwa karong adlawa kay ang Warriors nakabaton man og "twice-to-beat" advantage batok sa Cobras.
Usa ka adlaw human ipahibalo ang pagka-suspenso ni Joven, kinsa miduwa og torneyo didto sa Deca Homes Phase 2 sa Tungkil, Minglanilla, si Tiukinhoy mipahamtang sab og susamang silot ngadto nilang Rene Pacquiao ug Jefferson Pria sa SWU tungod sa susama nga kalapasan.
Gihigpit sa pagpatuman ni commissioner Felix O. Tiukinhoy ang lagda sa CESAFI aron pagdisiplina sa mga badlungon nga players.
Lain pang gisuspenso mao ang tulo ka contestants sa slam dunk contest nga sila si Eulogio Lasala, Jr. sa University of the Visayas, Chester Curso sa Cebu Institute of Technology ug Jefford Aldave sa Don Bosco Technology Center kinsa wala maka-eskapo sa kapungot ni Tiukinhoy human sila magdumili pagsalmot sa maong kompetisyon nga nakahatag og ngil-ad nga imahe sa CESAFI.
Nagpabiling kampiyon si Elwin Durano sa University of Southern Philippines Foundation (USPF) Panthers human mi-atras ang iyang mga kontra.
Atol sa All Star Games, ang West miharos batok sa East.
Sa collegiate division, ang West All Star ni coach Roel Gomez naka-ipsot batok sa East ni coach Elmer 'Boy' Cabahug sa iskor nga 83-82, samtang sa juniors division, midaog sab ang West ni coach Reggie Licanda batok sa East, 100-95 ni coach Delfin Pepito Jr.
Si Arvin Kim maoy nahimong bag-ong kampiyon sa three-point shootout human mi-iskor og 19 puntos batok sa iyang kaparang nga si Michael Cantonao sa USC kinsa mi-iskor og 15 puntos.
Ang duha ka higante nga sila si Gregory Slaughter (6'11) sa UV ug June Mar Fajardo (6'9) nangulo sa Mythical Five uban nilang Moncrief Rogado sa UC, Ritchum Dennison sa UV ug Eliud Poligrates sa SWU.
Sila si Fajardo ug Rogado parehong mi-iskor og 16 puntos, aron pangulohan ang West team, samtang si Poligrates midugang og 11 puntos. Sa habig sa pilderong East, si Dennison miburak og 17 puntos ug sila si Slaughter ug Phil Mercader parehong may 12 puntos sa maong kapildihan.
Puntos matag usa:
West (83)—— Fajardo 16, Rogado 16, Poligrates 11, Diango 9, Luceño 6, Armecin 5, Padillo 5, Colegado 4, Abella 2, Hermosa 2, Gallarde 2
East (82)——— Dennison 17, Slaughter 12, Mercader 12, Pateño 8, Cincoflores 7, Rivera 7, Diputado 6, Lao 4, Duran 3, Amores 3, Dajalos 3 Halftime: 54-40 (BANATNEWS)