CEBU, Philippines - Kumbatihan na karon ang gipaabot nga 6th season sa Shakey's Girls V-League Visayas Regional eliminations diha sa Lapu-Lapu Sports Complex sa Lapu-Lapu City.
Ang Pajo National High School ni coach Fr. Rolando T. Manayon modepensa sa ilang korona batok sa mga lig-ong kaatbang .
Gikatakda sab nga mosalmot ang Abellana National School, University of San Carlos, University of San Jose-Recoletos ug ang Cebu Schools Athletic Foundation Inc. (CESAFI) champion University of Southern Philippines Foundation.
Dose na ka teams ang nipadayag sa ilang partisipasyon ning tinuig nga junior girls volleyball tournament diin ang kampiyon makaangkon og katungod aron morepresentar sa Cebu alang sa national championships nga anhi himuon sa dakbayan sa Sugbu karong Nobiyembre 19-21 sa USC main gym.
Ang uban pang mga partisipanteng koponan mao ang St. Louis School of Mandaue, Mandaue Comprehensive National High School, St. Theresa's College, CIC-Mandaue, PAREF Southcrest, Don Gerardo National High School ug ang San Isidro High School.
Ang kompetisyon mosubay og single round robin format sa matag bracket diin ang top two squads moabante sa crossover semifinals.
Human sa opening ceremony, ang Pajo moharong sa Don Gerardo alang sa pasiunang duwa sa alas-2 sa hapon ug sundan kini sa gubat tali sa Southcrest ug St. Louis of Mandaue, STC batok San Isidro, USPF batok USC, Mandaue Comprehensive batok USJ-R ug Abellana batok CIC-Mandaue. (BANATNEWS)