CESAFI All-Star Games na

CEBU, Philippines - Entertainment to the max.

Mao kini ang masaksihan sa mga mahiligon og basketbol karong adlawa atol sa pagpahigayon sa tinuig Cebu Schools Athletic Foundation, Inc. (CESAFI) East vs. West All-Star Game sugod sa ala-1 sa hapon diha sa Cebu Coliseum.

Mag-abot ang tanang mga maayong laki nga gihagpatan gyud sa CESAFI ug magtigi usab sa abilidad ang mga tirador gikan sa gawas alang sa three-point shootout ug mag-abot sab ang mga tag-as og layat nga players alang sa slam dunk contest.

Mangulo sa three-point shoot-out mao si defending champion Moncrief Rogado sa University of Cebu, samtang si Elwin Durano sa USPF modepensa sa iyang korona isip slam dunk king.

Ang mga pambato sa East team ni coach Elmer 'Boy' Cabahug nga pagalangkuban sa mga players gikan sa UV, USJ-R, CIT ug USPF, pangulohan nilang Gregory Slaughter, Edwin Bibera, Fritz Dajalos, Chris Diputado ug Harold Cincoflores isip starting five, samtang ang first five sa West team ni coach Roel Gomez nga gilangkuban sa mga star players gikan sa UC, USC, SWU ug DBTC mao sila si June Mar Fajardo, Eleazar Armecin, Eliud Poligates, Gilbert Gallarde ug Janssen Abella.

Sama sa naandan, mag-abot sab ang mga star players sa high school division diin si Delfin Pepito Jr. maoy mo-coach sa East ug si Reggie Licanda alang sa West.

Ang champion team sa collegiate division makadawat og P10,000, samtang P5,000 ang mabulsa sa mapilde. Sa high school, ang modaog makadawat og P8,000 ug P4,000 ang madawat sa pilderong koponan.

Ang mga mosalmot sa three-point shoot-out mao sila si Demo Nuevo Filoteo sa USP, Michael Cantonao sa USC, Arvin Kim Gomez sa UC, Mykiel Cabahug sa UV, Marvin Duran sa USJ-R, Celso Colegado Jr. sa DBTC, Eliud Poligrates sa SWU ug Karen Rick dela Cerna sa CIT.

Gawas ni Durano, ang laing mosalmot sa slam dunk contest mao sila si Junjun Lasala sa UV, Kevin Quilantang sa UC, Abulaiz Suliman sa USJ-R, Rene Pacquiao sa SWU, Jefford Aldave sa DBTC ug Chester Curso sa CIT.

Ang champion sa three-point ug slam dunk contest mobulsa og P5,000 matag usa. 

Ang tinuig nga CESAFI All Star Game gipaluyohan sab sa Grosby.    (BANATNEWS)