CEBU, Philippines - Usa ka adlaw human ipahibalo ang pagka-suspenso ni Paul Joven, ang star player sa University of San Carlos (USC) Warriors, laing duha ka players sa Southwestern University (SWU) Cobras nga sila si Rene Pacquiao ug Jefferson Pria ang dili na sab tugotan nga makaduwa sa nanghinapos na nga 9th Cebu Schools Athletic Foundation Inc. (CESAFI) basketball event.
Ang taho kalabot sa pagka-suspenso nilang Pacquiao ug Pria, gibutyag ni CESAFI commissioner Felix O. Tiukinhoy Jr. ug iya kining gibuhat aron pagdisiplina sa mga badlungon nga players nga hangtod karon wala morespeto sa lagda sa CESAFI.
Sila si Pacquiao ug Pria nasakpan nga niduwa og laing torneyo niadtong Oktubre 8, pipila lang ka adlaw human sila mapilde batok sa Warriors, 72-80.
Nagtuo ang duha nga natagak na sila ug mao na kadto ang katapusan nilang duwa CESAFI niini nga season.
Bisan pa man tuod og tugotan ang argumento nga humana ang season sa Cobras, ang season sa CESAFI nagpadayon pa hangtod dili mahuman ang "best-of-five" finals.
Ang gibuhat nilang Joven sa USC ug ingon man nilang Pacquiao ug Pria sa SWU, nahisupak sa Section 6 sa Article A sa CESAFI ubos sa eligibility o qualification sa mga collegiate players nga nagdili kanila pagduwa sa laing torneyo samtang padayon pa ang CESAFI season.
Sa miaging tuig, ang Cobras mismo maoy midisiplina sa ilang players, kinsa ilang hisakpan nga niduwa og laing torneyo hinungdan wala sila maka-abante sa semifinals
Unang mibuto ang taho kalabot ni Joven dihang niduwa siya og exhibition game didto sa DECA Home Phase 2 Christmas Friendship Games sa barangay Tungkil, Minglanilla niadtong Septiyembre 27 usa ka semana sa dili pa ang quarterfinals.
Sa iyang bahin, si SWU athletic director Ryan Aznar nagkanayon nga wala siya'y laing mahimo kun dili ang pagtuman sa lagda sa CESAFI.
Sa wala pa motumaw ang kontrobersiya sa basketbol, na-igo sab sa kontrobersiya ang CESAFI dihang tulo ka volleyball coaches ang gi-ban tungod sa gihimong pag-walkout. (BANATNEWS)