Maglev, Gilette mimakmak sa kaatbang

CEBU, Philippines - Gipanglampurnas sa Maglev '90 ug Gilette '85 ang ilang tagsa-tagsa ka karibal sa 2009 University of San Carlos Boys High Alumni Basketball Association (USCBHABA) Atan Guardo Barkadahan Cup Second Conference diha sa USC-North campus gym.

Ang Maglev nagsalig sa ilang mapintas nga atake aron buntogon ang Kidneycare sa iskor nga 77-66, samtang ang Gilette mipahimulos sab sa ilang kainit sa sayong bahin sa duwa aron pagpulbos sa Dental One, 87-77.

Si Dennis Que mipabuto og 34 puntos alang sa Maglev nga wala na molingi pa human makabentaha og 10 puntos paghuman sa first period, 23-13.

Mihulga ang Kidneycare pinaagi sa paglaslas sa iskor nga 32-35, apan ang Maglev mipatuman sa ilang hugot nga depensa sa nahabiling duha ka kuwarter aron pagposte og 11 puntos nga kadaugan.

Sa sayo pa, si Lou Regidor mikagis og 28 puntos alang sa Gilette nga mimudmod og maayo sa Dental One human milabaw og 13 puntos paghuman sa unang 10 minutos sa duwa, 26-13.

Napahakan hinuon sa Dental One ang labaw ug mihiyos kini ngadto na lang sa kuwatro puntos, 39-43, apan ang nagluya nga Gilette nabalikan sa ilang kalagsik sa second half aron pagbaton og puntos nga kalampusan.

Puntos Matag Usa

 Unang duwa:

GILETTE (87) - Regidor 28, Chan 23, Ramos 10, Sepe 9, Yu 9, Aznar 8

DENTAL ONE (77) - Cabaltera 23, Balankig 20, Cabahug 19, Ceniza 7, Salvador 6, Ylanan 2

Ikaduhang duwa:

MAGLEV (77) - Que 34, Lawas 17, Wong 10, Sievert 8, Cotelo 4, Piquero 2, Quioco 2

KIDNEYCARE (66) - Catapusan 29, Adolfo 11, Tabares 9, Demecillo 7, Simene 7, Cuyos 2, Honorio1. - – BANAT NEWS