Finals sa Aloguinsan Mayor's Cup himuon karong Okt. 18

CEBU, Philippines - Ang finals sa tinuig nga Aloguinsan Mayor's Cup Open basketball tournament himuon karong Oktubre 18 diha sa matahom nga korte sa lungsod sa Aloguinsan sa habagatang Sugbu.

Ang maong torneyo gipasiugdahan ni Aloguinsan Mayor Cynthia Moreno, uban sa abag ni Vice Mayor Chonse Moreno ug sa mga sakop sa Aloguinsan municipal council.

Usa sab kini ka kalihukan agi'g pagpangandam alang sa tinuig nga kapistahan sa nahisgutang lungsod.

Gihimo usab kini aron pagtabang sa mga batan-on aron mahalikay sa bisyu, ilabi na sa ginadiling droga.

Gibuksan ang maong torneyo niadtong Oktubre 3 diin unom ka teams ang nisalmot niini.

Kini mao ang Ave Maria, Sunset View, Villa Mariska, JDCC, Lauron Enterprises ug Survivors.

Si Elmer 'Toto' Biton, kanhi sakop sa USPF Panther maoy milingkod isip tournament director. – BANAT NEWS