"Roar to Grow Run" pormal nga gilusad

CEBU, Philippines - Sa labing unang higayon sa kalihukan sa lumba sa dagan, gibawalan ang pacers atol unya sa pagpahigayon sa Cebu Lakandula Lion’s Club sa “Roar to Grow Run’ nga gikatakda karong Nobiyembre 15 diha sa Terraces, Ayala Center Cebu.

Mao kini ang gipahibalo sa Cebu Lakandula Lion's Club officers nga gipangulohan sa ilang presidente nga si Ritche Mendoza atol sa paglusad sa maong kalihukan kagahapon diha sa Zone 360 luyo sa Park Mall sa north reclamation.

Sa sayo pa, gibawalan ang top 5 runners sa pagsalmot sa maong kalihukan hangtod nga nausab ang desisyon aron himuon nga 10K run nga usa ka open ug ang 3K run alang sa neophytes.

Giklaro ni Mendoza nga alang lang sa mga bag-ong sulbong nga runners ang mamahimong mosalmot sa 3K.

Gawas sa mga tropeyo ug medalya, ang makampiyon sa 10k run mobulsa og P5,000 sa men ug women's division, samtang ang second ug third placers makadawat og P3,000 ug P2,000. Ang fourth hangtod sa 10th placers makadawat og P500 matag usa.

Ang top three finishers sa 3K makadawat og P3,000, P1,500 ug P1,000 matag usa, samtang ang fourth ug 10th placers makadawat og P200 matag usa.

Ang registration fee nagkantidad og P200 libre na niini ang singlet. Ang registration areas nahimutang diha sa Zone 360 sa Park Mall ug Mango Avenue, Philippine Sports Commission nga nahimutang sa Cebu City Sports Center ug sa Casa Ilonga sa Robinson’s Place-Cebu. – BANAT NEWS