Looc Twister mipilde sa LLBARollway

CEBU, Philippines - Mipabuhagay og makalisang nga atake ang Looc Twister nga maoy ilang gihimong hinagiban pagmasaker sa LLBA/Rollway, 116-96 sa ilang exhibition game diha sa Villas Magallanes gym sa Lapu-Lapu City.

Ang Looc mirehistro dayon og 13 puntos nga bentaha, 29-16 paghuman sa unang 10 minutos sa duwa. Ubos sa kombinasyon nilang Ricky Dungog ug Nilo Bintain, mitubo ang labaw ngadto sa 19 puntos sa halftime, 54-35.

Sa giya nilang Allan Sepe ug Neil Pepito pinaagi sa ilang nagpungasi nga mga puntos, nakan-an sa LLBA ang labaw ug miabot na lang og 13 puntos sa third quarter, 75-32. Apan ang Looc dali usab kaayong nakarekober ug nainat og balik ang ilang labaw ug sukad niadto ila na nga nakontrolar ang dagan sa duwa sa final period.

Makatarunganon hinuon ang kapildihan sa LLBARollway ni coach Jerry Augusto kay wala makaduwa sila si Ram Gomez, Mario Bancale, Cacay Versoza ug Dandan Ramos.

Si Ricky Dungog miburak og 24 puntos aron pangulohan ang Looc Twister, gisundan ni Nilo Bintain sa iyang 20 puntos.

Ang presidente sa LLBA nga si Sepe ug Pepito parehong milansang og 15 puntos aron pangulohan ang LLBARollway. Si Rey Amodia mitampo og 14 puntos, si Ernie Giganto miposa og 13 puntos, si Billy Nadado mitimbre og 12 puntos ug si Arman Lamoste mitimang og 10 puntos.

Ang sinaligan sa LLBA nga si Boboy Ciriaco wala maka-arte tungod sa kahigpit sa depensa ni Bintain ug igo lang kini mitampo og tres puntos.

Ang Looc-LLBA showdown natigayon pinaagi sa pagpaluyo ni Looc Barangay Captain Cocoy Dungog.

Sa laing bahin, ang Saint Alphonsus Catholic School (SACS) nga gipangulohan ni MVP LJ Versoza maoy morepresentar sa dakbayan sa Lapu-Lapu sa umaabot nga CVIRAA meet sa sunod tuig.

PUNTOS MATAG USA

LOOC (116) - Dungog 24, Bintain 20, R. Baguio 16, Bagano 15, Magat 13, Urdaneta 10, Patalinghug 9, Tagalog 5, A. Baguio 4, Ymbong 4

LLBAROLLWAY (96) - Sepe 15, Pepito 15, Amodia 14, Giganto 13, Nadado 12, Lamoste 10, Ngujo 9, Augosto 6,Ciriaco 2 (FREEMAN NEWS