Casino sulod sa finals human maka-upset

CEBU, Philippines - Tam-is kaayo ang nahimong upset nga kadaogan sa underdog nga Casino Rubbing Alcohol tungod kay mao kini ang naghatag kanila’g luna sa finals atol sa nagpadayong 2009 Integrated Bar of the Philippines (IBP) basketball tournament diin ilang gipitol ang siyam ka sagunson nga daog sa Super Idols, 69-62 kaniadtong Sabado didto sa Capitol Parish gym sa dalan Escario, ning dakbayan. Human sa ilang 19-16 nga labaw sa first period, kalit lang namugnaw ang Super Idols ug dihang may higayon na unta sila pag-rekober, nahutdan sab sila’g oras aron hingpit nga iyabo ang Casino.

Hinoon bisan pa sa maong kapildehan, ang Super Idols aduna gihapo’y laing higayon pagpa-ila nganong sila’y ilhon nga labing maayong team atol sa knockout finals sunod semana.

Sa laing duwa, gikunis-kunis sa Pecandela Law Firm ang Pañeros pinaagi sa pag-iskor og 85-66 nga kadaogan.

Walay puas nga nagpabuhagay og puntos ang Casino didto sa fourth quarter pinaagi sa pagtimon nilang Richard Bauzon uban kang Wilbert Dumon ug William Mañus aron molampos sa ilang dautang tinguha pagbugto sa nagkutay nga daog sa Super Idols. Si Bauzon maoy nangu sa Casino pinaagi sa iyang 17 puntos samtang si Dumon midugang og 14 puntos ug si Mañus mitunol og 12 puntos.

Ang Super Idols gipangulohan ni Benjo Santiago kinsa mihagdaw og 20 puntos samtang si Fermin mihipos og 17 puntos.

Sa laing bahin, sila si Tommy Yu ug Francis Pepito maoy nangu sa Pecandela pinaagi sa ilang 18 ug 15 puntos. Sila maoy makigsangka sa Pañeros alang sa ikatulong pwesto.

Si Ting Ordeniza mi-iskor og 17 puntos alang sa Pañeros ug si Barry Busi miposa og 16 puntos.

Puntos matag usa:

First Game:

Casino (69)— Bauzon 17, Dumon 14, Mañus 12, Bragat 8, Sumampong 4, Tombago 4, Amores 4, Yap 3, Ceniza 3

Super Idols (62)— Santiago 20, Pepito 17, R. Quijano 11, Fernandez 8, Abayon 4, Malig-on 2

Second Game:

Pecandela (85)—Yu 18, Pepito 15, RM Gamallo 11, Capoy 10, Gealon 9, Tenefrancia 8, I. Gamallo 6, Avila 4, Cañete 4

Pañeros (66)— Ordeniza 17, Busi 16, Balorio 14, Molde 8, Pepito 5, Anching 2, Aliño 2, Kagulada 2. -  BANAT NEWS