CEBU, Philippines - Mirehistro na sab og laing daog ang COMFA General Merchandise ni team owner ug LLBA treasurer Ely Gomoz human nila gipulbos ang Islander, 77-61 sa nagpadayong aksiyon sa Mactan Island Basketball Association (MIBA) cagefest niadtong miaging adlaw diha sa Pusok Sports Complex, dakbayan sa Lapu-Lapu.
Sayong miarangkada ang COMFA ubos sa liderato ni Lito Seno ug miposte kini'g otso puntos nga bentaha sa unang kuwarter, 21-13.
Sa abag nilang Eper Adlit, Ervin Dorig, Ram Gomez ug Ely Gomoz, miburot ang labaw ngadto sa 11 puntos sa halftime, 41-30.
Miaksiyon og takilid ang COMFA sa third quarter dihang ang ilang mga mamuntosay nga sila si Seno ug Jun Eroles gihigpitan og bantay. Apan bisan pa, si Seno nakahimo gihapon sa pagkutlo og 15 puntos aron pangulohan ang iyang koponan ngadto sa kadaugan, samtang si Eroles igo lang mi-iskor og kuwatro puntos.
Milabaw ang Islander sa labing unang higayon sa iskor nga 40-38, apan wala kini magdugay sa ilang mga kamot kay wala man mahuwasi si Seno sa iyang pagmangtas. Nailog og balik sa COMFA ang labaw ug wala na kini molingi pa sa naghangak nga Islander sukad niadto.
Nakatampo sab og daku sa maong kadaugan sila si Adlit, Dorig, Gomoz ug Gomez nga miabuno og 13 puntos matag usa.
Ang pilderong Islander ni coach Eddie Bontes gipangulohan nilang Temor Portugaliza, Bulldog Ybañez, Eddie Bontes ug Batosalem nga parehong mipupo og otso puntos.
Mga referees sa maong duwa mao sila si Misael Tajanlangit, Chokie Ibersco ug Ampog Pino. Sa lamesa mao si Dad's Linao.
Ang maong torneyo nga gidumala ni Lando Dueno gipaluyohan ni Mactan Brgy. Capt. Paz Radaza ug Pusok Brgy. Councilor Jun Gomez. Si Harry Radaza maoy commissioner sa maong liga.
PUNTOS MATAG USA
COMFA (77) - Seno 15, Adlit 13, Dorig 13, Gomoz 13, Gomez 13, Tesaluna 5, Eroles 4, Simbajon 3
ISLANDER (61) - Portugaliza 8, Ybañez 8, Bontes 8, Batosalem 8, Cosep 7, Butaya 6, Poyales 6, Celiz 4, Ymbong 4, Dignos 2 (BANATNEWS)