Binukbukay sa Dalaguete

CEBU, Philippines - Makasaksi na sab og laing binukbukay ibabaw sa ring ang mga residente ug sa mga kasikbit nga dapit sa Dalaguete dihang ang SGG Sports Promotions mopasiugda sa ilang ikaduhang hugna sa "Friday Nights Live" ugma sugod sa alas-7 sa gabii didto sa Dalaguete Sports Complex.

Mopakita og aksiyon sa maong boxing card mao si RP No. 1 Nelson Llanos sa Butuan City batok ni RP No. 3 Julius Alcos sa IPI-Mandaue alang sa bakanteng RP light flyweight title.

Sa supporting bout, si Warlito Fareñas sa Bacolod City makigsinukliay og kumo batok ni Roel Onor sa Butuan City, si Weng Haya sa Mandaue makigbinukbukay batok ni Romnick Rapista sa Butuan City, samtang si Ramil Soso sa Butuan City makigharong batok ni Roldan Malinao sa Agusan del Sur.

Sila si Reil Mandate, Jesus Mercado, Alde Zosa ug Jason Casimiro sa Omega Boxing Gym sa Mandaue mopakita sab og aksiyon batok nilang Jayme Bermiso, Jeffrey Paulino, Arnel Adan ug Juan Purisima.

Ang official weigh-in alang sa maong boxing event himuon karong alas-10 sa buntag diha sa IPI-Mandaue compound.

Ang maong kalihukan hinugpong proyekto sa SGG Sports Promotions ni international promoter Sammy Gello-ani ug Omega Boxing Gym uban sa abag sa local officials sa lungsod sa Dalaguete.

Ang tiket nagkantidad og P50 alang sa ringside ug P20 sa general admission. (BANATNEWS)