CEBU, Philippines - Nangharos ang mga koponan sa Minglanilla sa ilang classification round aron paghari sa Cluster I ug ingon man pagbaton og automatic semifinal slots sa men ug women's divisions sa 5th Governor Gwen Garcia Unity Volleyball (GUV) Cup niadtong Domingo didto sa Sibonga Sports Complex sa Sibonga, Cebu.
Ang Minglanilla belles ni coach Lemuel Dave Arreza mi-iskor og 5-0 sa women's division. Una nilang gibiktima mao ang Dalaguete, 25-12, 25-22, gisundan sa San Fernando, 25-6, 25-18.
Ang Minglanilla luyo sa mga paningkamot nilang Mirza Daytia, Loida Grava, Rose Cañazares, Luane Lawian, Niña Caderao ug Vanessa Juezan nakalahutay sa makutas nga duwa batok sa Sibonga, 25-13, 15-25, 25-11. Midaog sab sila batok sa Alcoy, 25-16, 25-16 sa wala nila maangkon ang laing daog batok sa Argao pinaagi sa default.
Sa men's division, ang Minglanilla spikers mitapos sab sa ilang duha ka adlaw nga kumbati pinaagi sa pagposte og 4-0 nga baraha.
Gisugdan sa Minglanilla ni coach Dindo Fernandez ang ilang kampanya pinaagi sa pagposte og 25-12, 25-11 nga kadaugan batok sa Dalaguete, sa wala pa nila makuha ang ikaduhang daog batok sa Argao pinaagi sa default.
Sa sunod nilang mga duwa, ang Minglanilla nakalingkawas sa Sibonga, 25-14, 30-28 ug sa San Fernando, 25-13, 25-13.
Nangulo sa Minglanilla aron mopakita'g aksiyon sa sunod hugna mao sila si Arreza, Klent Dacayana, Nathaniel Abellano, Mark Albert Rico, Franz Sidy Opsima ug Al John Archival.
Ang runners-up sa Cluster I mao ang Dalaguete sa women's division ug San Fernando sa men's category.
Ang GUV Cup dad-on ngadto sa Boljoon alang sa Cluster 2 matches karong weekend. (BANATNEWS)