Junior Webmasters sud semis

CEBU, Philippines - Miabante na sa semifinals ang University of Cebu (UC) Junior Webmasters dihang ilang gipanitan ang Don Bosco Technology Center (DBTC) Junior Greywolves, 83-65 sa secondary division sa 9th Cebu Schools Athletic Foundation Inc. (CESAFI) basketball event kagabii diha sa University of San Carlos (USC) gym.

Ang UC, kinsa nakaangkon og "twice-to-beat" advantage nakaangkon og laing kahigayonan aron mapanalipdan ang ilang titulo sa secondary division.

Unang naglabaw ang DBTC sa pagpangulo ni John Eleazar Ruiz, kinsa maoy mihimo og katapusang basket alang sa sayes puntos nga labaw sa third period, 42-36, apan kalit lang mirapido og puntos ang UC aron mailog ang labaw, 59-45 paingon ngadto sa final period.

Ang point guard nga si Jeri Pingoy, kinsa nahiagom og injury sa iyang tudlo, mipakita gihapon sa iyang katakus sa dribbling aron pangulohan ang fastbreak game sa UC.

Si Pingoy maoy topscorer sa Junior Webmasters pinaagi sa iyang 21 puntos, gisundan nilang Alfred Codilla ug Gerald Ampoon nga nagkumboya og 22 puntos.

Si Lourence Ruiz, maoy nangulo sa giihaw nga Junior Greywolves sa iyang 21 puntos, samtang ang iyang igsuon nga si John Eleazar miposa og 11 puntos ug si Jose Marlo Pono milawog og 10 puntos.

Sa maong kadaugan, posibleng mabuhi pag-usab ang panagribal sa Junior Webmasters ug no. 2 qualifier nga University of the Visayas (UV) Baby Lancers sa semifinals.

PUNTOS MATAG USA

UC (83) – Pingoy 21, Codilla 12, Ampoon 10, Aranas 10, Labolabo 9, Saramosing 9, Nazareno 6, Padilla 4, Taliisic 2

DBTC (65) – L.Ruiz 21, J.Ruiz 11, Pono 10, Esbra 8, Yap 7, Alburo 4, Empenio 2, Aliganga 2   (BANATNEWS)