NBA SEASON na sab

CEBU, Philippines - Sugdan karong Huwebes, Oktubre 1 ang 2009-2010 season sa National Basketball Association.

Unang mosalida mao ang Denver Nuggets batok sa Utah Jazz alang sa sangka sa Western Conference teams. Ang Nuggets maoy no. 2 sa miaging season samtang ang Jazz diriyot matagak apan nakagunit sa dunggan isip no. 8 seed.

Pagkasunod adlaw sa Oktubre 2, magsangka sab ang mga teams sa Eastern Conference diin mag-abot ang Chicago Bulls, ang no. 8 sa miaging season batok sa Indiana Pacers nga wala makasulod sa playoffs.

Ang regular season matapos sa April 14, 2010 ug dayon mosunod ang playoffs.

Atong paninguhaon nga among mahatag kaninyo matag adalw ang resulta sa mga duwa sa NBA ilabi na kadtong dili makalugar ug tan-aw sa telebisyon ug kadtong walay internet connection sa ilang panimalay.

* * *

Usa ka suki sa Banat News nga si Glen Bonghanoy sa Naga, Cebu nag-email kanato ug nangutana ug unsa gyu’y buot ipasabot nianang pound for pound ug nganong ilhon ang usa ka boksidor nga pound for pound king.

Ato siyang gitubag nga kanang pound for pound king dili buot pasabot unsa kadaghan sa away ug unsa kadaghan ang imong daog sa knockout o sa unanimous decision apan ang buot ipasabot ang gidaghanon sa imong daog gikan sa lain-laing weight divisions. Sama pananglit modaug ka sa bantamweight ug matag saka nimo ug timbang ikaw gihapon ang modaog.

Busa magtakos una sila si Floyd Mayweather Jr. ug Pinoy boxing hero Manny Pacquiao kung kinsa gyud sa tibuok kalibotan may ilhon tali kanilang duha nga pound for pound king.

Nagpakisayod sab si Bonghanoy sa tanang mga weight division gikan sa pinakagaan nga timbang hangtod na sa pinakabug-at. Wala niya isulit kung apil ba ang sa amateur boxing kay lahi ang professional ug timbang ilabi na kung maghisgot ug Olympic boxing nga menos kaayo ug heavyweight boxers.

Alang sa maong tubag, ang pinakagaan mao ang paper weight division ug ang pinakabug-at mao ang super heavyweight division. Atong pasalamat ni Mr. Bonghanoy sa pag-email kanato ug sa pagsalig sa Banat Sports nga matod pa niya dili mahitabo nga dili siya magpalit matag adlaw kay kini maoy paborito niyang basahon.

Gikan sa Banat News, daghang salamat kaninyo ug among paningkamotan nga mas paanindoton pa ang inyong paboritong pamantalaan aron dili kamo pul-an sa pagsunod kanamo.

* * *

Di nato mahimong palabyon karong semanaha kung dili kita makahatag ug pasalamat kang Jonji Y. Gonzales, ang akong kauban kanhi sa The Freeman Daily agi sab ug pagpadayag sa atong kalipay nga nalakip kita sa mga dinapit nga mga sakop sa media ngqa nagsaulog karon sa Press Freedom Week.

Kasagaran gud mahitabo dili man kita malakip pag-imbetar kay ang uban natong higala sa sports nahikalimot naman nato ug usahay dili sab nato sila mabasol kay tungod niinng teknolohiya pinaagi sa email, dili naman usahay kinahanglanon ang atong presensiya sa usa ka lugar diin ipahagayon ang sports kay e-email naman lang deretso sa mga tigdumala ug tigpasiugda sa sports.

Kana pa hinoon nga gawas nga dili na kita mahago bayad-bayad sa jeep ug tigbason usahay sa mga taxi drivers nga dili mosukli kung ubos na sa 10 pesos ang nahibilin kay lagi kuno wala na silay sensiyo, mas kumpleto pa ug detalye ang atong balita kay kita usahay aduna may makalimtan ilabi na sa dalidali aron pag-apas sa deadline.

Sama pananglit sa miaging tuig, wala ako mahatagi ug ticket tungod kay aduna pa may mas ilado kanako sa sports ilabi na ang mga bag-o ug batan-ong sports writers ug okay lang nako kay sila man sab ang kanunay makit-an sa field. Ang akong dagway gawas sa CESAFI, adto ra man intawon makit-an sa mga barangay.

Walay kabutangan sa kalipay sa mga sakop sa media nga nagsawo sa pagkaon ug nagsayaw-sayaw sulod sa Arctic Room sa Waterfront Hotel Lahug ilabi n gyug kadtong midaog sa raffles ug sa grand prize nga mini laptop nga si Sammy Yncierto. Malipayon ang sinugdanan ug susama kab kini ka malipayon atol sa pagtapos sa usa ka semanang kasaulogan sa Press Freedom Week ug didto kini taposa sa JSU/PSU Mariner’s Court sa DYLA compound sa pier 1 kaniadtong Sabado sa gabii diin si Marlon Billeta sa ABS-CBN, ang lokal version ni Marc Logan, maoy midaog sa grandprize nga colored TV plus DVD. Si Billeta milingaw sab sa mga judges sa contest dihang mi-awit siya’g “Yuta sa Balili” nga iyang gitagik nunot sa orihinal nga tunong “Baleleng.”

Ang panapos o culminating affair gipaluyohan sa San Miguel Corp. ug salamat sa atong mga higala nga sila si Girlie Garces ang head sa PR sa Corporate Communication Office ug Jerry Roa nga kanhi maoy nahupot sa maong posisyon.

SG. Belated birthday greetings yesterday, September 27 to Ms. Gina Lim, Cebu manager of the Columbia Fruit Traders owned by golfing buff Mr. Jimmy Ngo. May you have many, many more birthdays to come. BANAT NEWS