Ninos vs. Landmasters sa Balamban karung gabii

CEBU, Philippines - Subling mag-abot ang dalan sa M.Lhullier Kwarta Padala-Cebu Niños ug Mandaue –Cebu Landmasters sa usa ka goodwill game karong alas-7:00 sa gabii diha sa Balamban Sports Complex.

Sa una nilang panagharung, ang M.Lhullier maoy mipatigbabaw batok sa Landmasters, 77-72, atoll sa Misamis Oriental leg sa Smart-Liga Pilipinas conference III, tulo ka semana na ang nilabay didto sa Xavier University gymnasium sa Cagayan De Oro City. Ang Niños maoy nilangkat sa MisOr leg championship.

Ang Niños ni team owner Michel J. Lhullier ug coach Raul “Yayoy’ Alcoseba pabilin karong way pilde human nila gi-sweep ang tulo ka Liga Pilipinas leg. Kasamtangan silang nagkupot og 45 puntos sa standing nga maoy naghatag kanila sa automatic berth ngadto sa ‘Super Five’ alang sa national championship karong Nobiyembre.

Sama sa gihapon, sila si Bruce Dacia, Stephen Padilla, Ariel Mepaña, Woodrow Enriquez ug Mark Ababon mao ang gilauman ni Alcoseba nga motimon sa opensa sa Niños.

Moabag usab sila si Marlon Basco, Richard Saladaga, Warren Ybañez, Abby Santos, Frank Nailon ug Mark Magsumbol nga gibira sa Niños gikan sa Quezon City Red Oilers.

Sa ilang bahin, ang Cebu Landmasters kinsa nakatabla sa Brgy.Ginebra Kings niadtong miaging semana, 79-all, magsalig nila ni Boyet Bautista, Francisco Mercado, Alex Cainglet, JP Alcaraz, Rino Berami ug Enrico Llanto.

Sa laing bahin, laing PBA team ang atubangon sa Niños, manulong karong Biyernes ang Coca-Cola Tigers sa usa ka charity exhibition game diha sa Cebu Coliseum. - Lemuel P. Maglinte (BANAT NEWS)