World Heart Day Run mosikad na

CEBU, Philippines - Kapin sa 500 runners ang managan sa pagsikad sa World Heart Day Run karong adlawa diha sa Cebu Doctors University Hospital sa Capitol Site, ning siyudad.

Ang lumba gibahin ngadto sa upat ka kategoriya - 3K (12 below), 6K (Mepz), 10K (Executive) ug 10K (Open).

Mga dekalibreng runners nga modagan karong adlawa naglakip nilang Mendel Lopez, Madelyn Carter ug ang mga Mindanao runners nga sila si Critfrankreadel Indapan ug Mary Grace Delos Santos.

Ganting salapi ang nagpaabot ngadto sa top runners. Ang kampiyon sa 10K Open modawat og P1,500 nga ganting salapi, samtang ang 10K Executives makaangkon og P1,000 ug ang 6K MEPZ mobulsa og P800.

Tumong ug tuyo sa maong lumba mao ang pagtigom og pundong salapi alang sa Heart Foundation nga itabang sa mga kabus nga adunay depektoso sa kasingkasing. (Lemuel P. Maglinte) (BANAT NEWS)