Nangka, Cantila gilihia'g daog

CEBU, Philippines - Gilihian og daog ang Nangka ug Cantila teams sa pagsugod sa 2009 Consolacion Fiesta Basketball Tournament diha sa Consolacion Sports Complex.

Nagsalig ang Nangka sa mainitong pangatake sa pagsugod aron ilubong angTolo-tolo, 81-55 sa Sangguniang Kabataan (SK) division, samtang ang Cantila nga gilangkuban sa mga magduduwa gikan sa barangays Cansaga, Tilhaong ug Lamag, wala sab makasinati og kalisud pagkulit og 52-37 nga kadaugan batok sa D'Popedmaro nga gilangkuban sa mga magduduwa gikan sa barangays Pulpogan, Poblacion Oriental ug Danlag ubos sa Association of Barangay Council (ABC) category.

Si RR Najarro mibugha og 31 puntos alang sa Nangka, nga wala gyud mohatag sa Tolo-tolo nga makagukod human miposte og 28-11.

Nakontrolar sa Nangka ang ilang 17 puntos nga bentaha sa halftime, 38-21 sa wala pa nila inata ang labaw ngadto sa 36 puntos, 64-28 paingon sa final period.

Sa laing bahin, ang Cantila misutoy sab human mirehistro og 18-7 sa first period. Ilang gitapos ang halftime, 29-17 ug dayon inat ngadto sa15 puntos, 42-27 paghuman sa third quarter.

Sa SK division, ang Sacsac naka-eskapo bitbit ang 58-53 nga kadaugan batok sa Tilhaong.

Nabitin og sayes puntos ang Sacsac sa first period sa iskor nga 6-12, apan mi-rally kini sa ikatulong kuwarter aron ilogon ang labaw, 38-36 nga nakapabuhi kanila og balik.

Ang duha ka bulan nga kompetisyon nga usa sa mga kalihukan sa tinuig nga kapistahan sa lungsod sa Consolacion sunod bulan, hinugpong gipasiugdahan ni ABC president Analee Gungob ug SK Federation chairperson Madel Hyacinth Herrera sa Barangay Pitogo. – BANAT NEWS