Baby Jaguars nakalingkawas

CEBU, Philippines - Nakalingkawas ang University  of San Jose-Recoletos (USJ-R) Baby Jaguars pinaagi sa pagkulit og impresibong 84-79 nga kadaugan batok sa University of San Carlos (USC) Baby Warriors aron pagbaton og "twice-to-beat' incentive sa quarterfinal round sa 9th Cebu Schools Athletic Foundation Inc. (CESAFI) basketball event niadtong Huwebes sa gabii diha sa Cebu Coliseum.

Sa laing duwa, ang University of Southern Philippines Foundation (USPF) Baby Panthers mitangag sab og daog pinaagi sa paglubong sa Don Bosco Technology Center (DBTC) Baby Greywolves sa iskor nga 115-74.

Tungod sa maong kadaugan, ang Baby Jaguars nga nagtangag og 5-3 nga baraha nakaangkon og   twice-to-beat advantage batok sa fifth-seed nga Sacred Heart School-Jesuits (SHS-J) Eagles unya sa quarterfinals nga sugdan karong Martes diha sa USC gym.

Si Gudeve Edo Autentico mi-iskor og 17 puntos alang sa Baby Jaguars, samtang sila si Venjie Trozo, Renzo Senining ug Clent Muñez nagkumboya og 43 puntos.

Upat sab ka Baby Warriors ang mikulit og double digits nga gipangulohan ni Cheeno Dalangpan nga adunay 15 puntos, gisundan ni Vincent Christopher Lora nga miabuno og 14 puntos.

Sa laing bahin, si Rommel Diapera naghuramentado na sab sa korte pinaagi sa pag-iskor og 31 puntos lakip ang siyam ka three-point shots aron pangulohan ang Baby Panthers, samtang si Joshua Corcilles miamot og 29 puntos.

Si Diapera lab-as pang mihaw-as og career-high 55 puntos uban ang 11 ka triples atol sa ilang pagmasaker sa Cebu Eastern College (CEC) Dragons, 150-65 niadtong Martes sa gabii. Si Diapera nagpauwan og nagkadinang unom ka triples sa fourth period human lang sa siya nakahimo’g tulo ka triples sa sayo pa.

Hinuon, ulahi na ang pagmangtas sa Baby Panthers tungod kay bisan pa sa maong kadaugan, igo lang sila mitapos og 3-5 nga baraha alang sa ikapito nga puwesto ug tungason ang ilang quarterfinals tungod kay ang ilang harungon mao man ang second seed University of the Visayas (UV) Baby Lancers sa quarterfinals.

Ang managsuong   Lourence ug John Eleazar Ruiz maoy nangulo sa Junior Greywolves pinaagi sa pag-iskor og 23 ug 22 puntos matag usa.

Puntos Matag Usa

Unang duwa:

USJ-R (84) - Autentico 17, Trozo 15, Senining 14, Muñez 14, Escatron 11, Alob 7, Go 2, Montecillo 2, Figues 2

USC (79) - Dalangpan 15, Lora 14, Kikuchi 11, Malata 10, Bacaltos 6, Romaguera 6, Omolon 5, Guardario 5, Rita 3, Palapar 3, Co 1

Ikaduhang duwa:

USPF (115) - Diapera 31, Corcilles 29, Arong 10, Pitogo 9, Lambujon 8, Rosales 8, Miñoza 8, Catipay 4, Silao 4, Baguio 2, Tumulak 2

DBTC (74) - L. Ruiz 23, J. Ruiz 22, Yap 12, Esbrra 4, Aliganga 3, Empenio 3, Ebajo 2, Tigullo 2, Alburo 1, Pono 1, Balorio 1. – BANAT NEWS