CEBU, Philippines - Miagi pa og kakulba ang University of the Visayas (UV) Baby Lancers una nila himulboli ang Sacred Heart School-Jesuits (SHS-J) Eagles, 89-82 aron tapuson ang elimination round sa ikaduhang puwesto sa juniors division sa 9th Cebu Schools Athletic Foundation, Inc. (CESAFI) basketball event niadtong Miyerkules sa gabii diha sa Cebu Coliseum.
Ang Baby Lancers nilabaw og 11 puntos sa halftime, 50-39 apan ang Eagles mitusik sa ikatulong kuwarter aron pagkitkit sa labaw ngadto na lang sa sayes puntos, 51-57
Misikit pa gyud og maayo ang Eagles ngadto sa kuwatro sa iskor nga 80-84 human sa jumpshot ni Adrian Marvin Ronald Muller sa katapusang 2:09 sa fourth period.
Apan gipakita sa Baby Lancers ang ilang kahanas ug gisumpo nila ang dautang laraw sa Eagles. Ilang gitapos ang eliminasyon uban ang 7-1 nga baraha, sunod sa walay pildeng University of Cebu (UC) Junior Webmasters, kinsa mikulit og talagsaong 8-0 sweep human sa ilang paglampurnas sa CIT Wildkittens,84-62 niadtong miaging adlaw.
Si Gerald Legarde, kinsa maoy usa sa nakapugong sa rally sa Eagles, maoy nangu sa Baby Lancers pinaagi sa iyang 18 puntos, samtang si Mark Linao miabuno og 16 puntos.
Human sa impresibong 4-0 sa sugod, ang Eagles wala na makadagit og daog sa katapusang upat nila ka duwa aron mobatog sa ikalimang dapit. Ang Eagles dili na sab makabaton og twice-to-beat advantage sa quarterfinal round nga sugdan sunod semana.
Si Kristoffer James Porter maoy nangulo sa naparot nga Eagles sa iyang 22 puntos, gisundan ni Muller nga adunay 13 puntos. Sila si Bradley Bacaltos ug Jerry Jan Albert Seno miamot og 12 puntos matag usa.
Puntos Matag Usa
UV (89) - Legarde 18, Linao 16, Brigoli 11, Ybañez 10, Marata 7, Pero 6, Smith 5, Calvo 4, Arong 4, Navaja 4, Suan 2, Mendoza 2
SHS-J (82) - Porter 22, Muller 13, Bacaltos 12, Seno 12, Diputado 9, Rama 8, K. Dinsay 4, Branzuela 2. – BANAT NEWS