Guardo nagpanikad sa maong lumba

CEBU, Philippines - Nagpanikad na si Jonathan 'Atan' Guardo alang sa iyang ikaduhang sunod-sunod nga pagdagan sa full-marathon race dihang moapil kini sa labing unang Quezon City International Marathon karong Oktubre 18.

Ang Quezon City International Marathon giisip nga usa sa labing daku nga lumba sa nasud ning tuiga.

Gawas sa full-marathon (42-K), may lumba sab sa 5K,10K ug 21K.

Gilauman nga 10,000 runners lakip na ang top marathoners sa nasud ug uban bahin sa kalibotan ang moapil sa ginukdanay.

Ganting salapi nga balor og P3 million ang nagpaabot alang sa mga mananaog sa tagsa-tagsa ka kategoriya.

Paninguhaon ni Guardo nga makatiwas siya sa lumba sama sa iyang nakab-ot sa una niyang full-marathon didto sa Hong Kong.

Ang two-time "Sportsman of the Year' awardee sa Sportswriters Association of Cebu (SAC) modagan uban sa mga sakop sa iyang running club nga naglakip sa iyang mga igsuon nga sila si Jerry ug Jeson, kanhi Cebu City councilor Joel Garganera, Ian Baguio, Allan Delantar, The Freeman sports columnist Raffy Uytiepo, Ariel Genobiago ug Mario Biscocho.

Ang kagamhanan sa Quezon City ubos sa liderato ni Sonny Belmonte mipasalig nga mosuporta sa tanang yugto sa marathon lakip na ang seguridad sa mga runners.

Manukad ang lumba sa Quezon Memorial Circle, moagi sa Commonwealth Avenue nga maoy ulohan sa lumba. – BANAT NEWS