Lawaan 1 gipanitan sa Tabunok 2

CEBU, Philippines - Gipanitan ug kaikog nga gilubong sa Tabunok 2 ang ilang silingang koponan    Lawaan 1 sa iskor, 91-71 sa seniors division sa 2009 Talisay City Mayor's Cup Inter-Barangay Basketball Tournament diha sa Talisay City Sports Complex.

 Nahimong yawi sa kadaugan sa Tabunok 2 mao ang lig-on nilang depensa nga maoy mipugong sa mga tirador sa ilang kaatbang. Napruybahan kini atol sa final period dihang igo lang nakatigom og 11 puntos ang Lawaan I batok sa Tabunok 2 nga miposa og 23 puntos sa giya nilang Jethro Cabanero ug Danilo Rabadon.

Si Cabanero mibugha og 26 puntos aron pangulohan ang Tabunok 2. Sila si Reymond Tabar ug Randolph Abatayo   nagkumboya og 28 puntos, samtang si Rabadon miamot og siyete puntos alang sa Tabunok 2, kinsa nilabaw og 10 puntos sa halftime, 54-44.

Ang naparot nga Lawaan I gipangulohan ni Jerry Carila, kinsa mikulit og 19 puntos, gisundan ni Armando de Jesus nga adunay 18 puntos.

Ang basketball tournament gipasiugdahan sa Talisay City Sports Commission (TCSC) uban sa suporta sa Talisay City Government ubos sa liderato ni Mayor Socrates Fernandez. 

Puntos Matag Usa

TABUNOK 2 (91) - J.Cabanero 26, Tabar 18, Abatayo 10, Sunga 10, Rabaya 8, Rabadon 7, Sacares 7, Campo 3, C.Cabanero 2

LAWAAN I (71) - Carilla 19, De Jesus 18, Cempron 13, Marilao 9, Bertulfo 3, Lasola 3, Librando 2, Obsioma 2, Masapequeña 2. – BANAT NEWS