CEBU, Philippines - Napugngan sa University of San Jose-Recoletos (USJ-R) Baby Jaguars ang mainitong rally nga gilusad sa Sacred Heart School-Jesuits (SHS-J) Eaglets aron pag-iskor og 94-82 nga kadaugan sa secondary match sa 9th Cebu Schools Athletic Foundation, Inc. (CESAFI) niadtong Domingo diha sa Cebu Coliseum.
Sa laing duwa, ang Don Bosco Technology Center (DBTC) Junior Greywolves mihangkab sa labing una nilang daog sulod sa pito ka duwa pinaagi sa paglubong sa mas
huyang pa nga Cebu Eastern College (CEC) Dragons sa iskor nga 102-63, apan ang 39 puntos nga kadaugan maoy labing ubos nga nakab-ot sa tanang nidaog batok sa Dragons.
Sayo kaayong mi-arangkada ang Baby Jaguars ug ilang gitapos ang first period sa iskor nga 28-15 ug dayon ilang gitak-op ang halftime sa iskor nga 51-32. Ila nga giinat ang labaw ngadto sa 25 puntos, 72-47, ug ang maayong nahimo sa Eagles mao ang pagkitkit sa labaw ngadto sa 12 puntos, 70-82 sa katapusang 4:56 sa duwa.
Si Clint Muñez maoy nangulo sa Baby Jaguars pinaagi sa iyang 24 puntos. Sila si Gudeve Edo Autentico ug Renzo Senining nagkumboya
og 37 puntos alang sa Baby Jaguars, kinsa nagtangag og 3-4 nga baraha.
Si Adrian Marvin Ronald Muller mao sab ang nangulo sa Eagles nga mikamada og 21 puntos, gisundan sa ilang sentro nga si Kristoffer James Porter, kinsa milawog og 15 puntos ug si Bradley Bacaltos miabuno og 14 puntos.
Sa sayo pa, si Chris Daryl Yap miposte og season-high 26 puntos alang sa Junior Greywolves.
Si Jerry Lin mikulit sab og team-high 17 puntos alang sa Dragons, ang labing una nga ang ilang player diriyot makaabot og 20 puntos.
Mao sab kini ang unang higayon nga tulo ka Dragons mikutlo og double figures, samtang ang ilang 63 puntos nga nahipos maoy labing daku niini nga season.
PUNTOS MATAG USA
Unang duwa:
DBTC (102) - Yap 26, J. Ruiz 17, Esbra 9, Balorio 9, L. Ruiz 8, Tigullo 8, Alburo 8, Aliganga 7, Haben 5, Empenio 4, Ebajo 3, Pono 2
CEC (63) - J. Lin 17, Belandres 12, Dela Cerna 10, Sypongco 6, Oplado 5, Aves 4, W. Lin 4, Quisagan 3, Damole 2
Ikaduhang duwa:
USJ-R (94) - Muñez 24, Autentico 19, Senining 18, Trozo 12, Alob 6, Montecillo 4, Figues 3, Go 3, Escatron 3, Mate 2
SHS-J (82) - Muller 21, Porter 15, Bacaltos 14, Diputado 11, Seno 7, Rama 6, Branzuela 5, Tecson 2, J. Dinsay 1 (BANATNEWS)