Baby Lancers nagpabiling sa ikaduhang dapit

CEBU, Philippines - Mitimbre na sab og laing daog ang University of the Visayas (UV) Baby Lancers dihang ilang gibiktima ang University of San Carlos (USC) Baby Warriors, 90-80 aron magpabilin sa ikaduhang dapit sa standings sa juniors division sa nagpadayong kumbati sa 9th Cebu Schools Athletic Foundation Inc. (CESAFI) basketball event kagabii diha sa Cebu Coliseum.

Nagkamang pa ang Baby Lancers sa unang-duha ka kuwarter diin igo lang kini milabaw og kuwatro puntos sa halftime sa iskor nga 40-36.

Sa ikatulong kuwarter, mihimo og mga kausaban ang Baby Lancers, apan wala kini makainat og maayo sa ilang labaw gumikan kay tubagon man sab dayon sa Baby Warriors sa matag higayon nga makakuha sila'g baskets.

Ang Baby Lancers mipatuman og full-court press sa kinatibuk-ang second quarter aron luyahon ang torotoy nga Baby Warriors hinungdan nga ang naulahi nakahimo og daghang turnovers.

Sila si Jasper San Brigoli ug Michael David Smith maoy mihaling sa mainitong rally aron pangulohan ang Baby Lancers pagposte sa kinadak-an nilang labaw nga 14 puntos, 55-41 human sa basket ni Francisco Arong Jr. sa katapusang 2:56 sa duwa.

Si Gerald Legarde maoy kinadak-ang nakuha nga iskor alang sa Baby Lancers nga adunay 12 puntos. Sila si Arong ug Mark Linao miugbok og 11 puntos matag usa, samtang si Christian Quilaton mihirit og 10 puntos alang sa Baby Lancers, kinsa nagbitbit og 6-1 nga baraha.

Si Gemuel Omolon, ang labing gamitoy nga magduduwa sa Baby Warriors mikulit og 16 puntos, samtang si Anthony Gai Romaguera miabuno og 15 puntos.

Puntos Matag Usa

UV (90) - Legarde 12, Arong 11, Linao 11, Quilaton 10, Brigoli 9, Ybañez 9, Suan 8, Pero 7, Marata 5, Smith 4, Calvo 2, Navaja 1

USC (80) - Omolon 16, Romaguera 15, Guardario 11, Rita 7, Co 6, Kikuchi 6, Lora 4, Malana 4, Bacaltos 4, Dalangpan 3, Palaplar 2, Bongo 2. – BANAT NEWS