Sitio Fatima mo-host sa "Paboksing sa Barangay"

CEBU, Philippines - Mowadwad na sab ang amateur boxers gikan sa nagkalain-laing boxing stable dinhi sa Sugbu alang sa laing edisyon sa Cebu City Amateur Developmental Tournament nga giulohan og "Paboksing sa Barangay 2009."

Unang mag-abot ang mga boksidor karong Septiyembre 18 diha sa Sitio Fatima sa Barangay Pahina Central, mosunod dayon ang Barangay Duljo Fatima sa Septiyembre 21-24.

Mga sikat nga boxing stable ang gipaabot nga mopadala sa ilang boksidor nga moaway sa 38 kgs., 40 kgs., 50 kgs. ug 63 kgs. divisions.

Lakip sa   mopakita og aksiyon mao ang mga batos sa Sanai Boxing Stable, Omega Boxing Stable sa Mandaue City, Losamba Stable ug mga boksidor gikan sa lungsod sa Compostela.

Mopakita sab sa ilang abilidad ang mga amateur boxers sa Cebu City Sports Center (CCSC) Stable, nga maoy nangharos sa Barangay Pahina San Nicolas leg.

Ang maong torneyo gipasiugdahan nila ni Cebu City councilors Sylvan 'Jack' Jakosalem ug Raul 'Yayoy' Alcoseba ug Michel Lhuillier uban sa suporta sa Cebu City Government ubos sa liderato ni Mayor Tomas Osmeña.   (Lemuel P. Maglinte)   (BANAT NEWS)