CEBU, Philippines - Kung maoy pasikaran ang labing bag-ong desisyon nga gipakatap sa International Basketball Federation (FIBA), dili pa makapangangkon ang Samahang Basketbol ng Pilipinas (SBP), Inc. ni magpapatigayon Manny V. Pangilinan, nga maoy gitugotan nga maoy modumala sa mga kalihokan sa basketbol dinhi sa Pilipinas tungod kay nakasupak sila sa nalatid sa Bangkok Agreement nga pinirmahan tali sa Pilipinas Basketball ug sa Basketball Association of the Philippines (BAP) kaniadtong Pebrero 4, 2007.
Sa pito ka pahina nga hukom nga pinirmahan usab sa FIBA nga girepresentahan ni FIBA chairman Dr. Borislav Stankovic ug mga sakop Dr. Carl Men Ky Ching ug Mr. Ken Madsen, nagkanayon nga dili pa tataw nga makontrolar sa SBP ang basketbol sa Pilipinas ug aduna pay gitukod nga special commission ang FIBA Central board aron pagsuta og usab kalabot sa kahimtang sa basketbol dinhi sa nasud sumala pa sa ilang tigum kaniadtong Mayo 22, 2009 didto sa Geneva, Switzerland.
Sa maong kalambigitan, ang FIBA Central Board mi-awhag sa SBP, Inc. sa pagsuwat kanila sa tinuoray nga kahimtang sa basketbol sa nasud sa dili pa moabot ang Nobiyembre 30 ning tuiga nga nangutana kanila mahitungod sa Bangkok Agreement lakip niini ang pangutana kung gituman ba sa SBP ang kasabotan.
Pipila sa angayan tubagon mao nga kung ang stakeholders sa Philippine basketball napatuman ba og tarung ug girespetohan ba unsay nasuwat sa nahisgotang Bangkok Agreement.
Mitumbok sab og rason ang FIBA nganong dili pa nila ilhon ang SBP tungod kay wala malipay ang Special Commission nganong dali ra kaayong nakakuha og visa ang upat ka sakop sa ilang delegasyon ug ang BAP wala man makakuha og visa alang unta ngadto sa Switzerland.
Ang pagkapakyas pagngadto sa BAP sa Switzerland nakahatag ug dakung babag sa hukom sa Commission tugod kay nahikawan man og katungod ang usa ka habig sa pagpadayag sa ilang posisyon diin angayan untang paminawon ang duha ka kampo atol sa tigum didto sa Geneva nga gimbut-an sa Order of Procedure. Ginamit ang nasabotan sa Bangkok Agreement, ang BAP group ubos ni chairman Luis R. Villafuerte mipasangil kang Pangilinan ug sa iyang grupo nga wala moila sa mga tinudlo o nominado sa BAP kinsa napili atol sa BAP-SBP Unity Congress kaniadtong Pebrero sa 2007.
Wala sab tumana ni Pangilinan ug iyang grupo ang saad sumala pa sa ilang nasabotan sa Bangkok Agreement ug wala ilha ang 60 niini ka sakop nga mitambong sa National Congress ug ingon man mibasol kang Pangilinan sa pagsupak sa rasyon sumala pa sa Bangkok Agreement diin nagmando nga ang BAP-SBP board of trustees pagarepresentahan og 12 ka nominees gikan sa BAP ug laing 12 nga gikan sa PB ug si Pangilinan isip ika-25 nga sakop, maoy magsilbing neutral arbiter atol sa pagpahigayon sa transition period nga wala gyud mahitabo kay interesado man si Pangilinan sa maong posisyon diin iyang gi-isip nga ang mga sakop sa BAP-SBP iyang mga kaatbang.
Matod pa sa kampo ni Villafuerte nga wala sab usba sa grupo ni Pangilinan ang corporate name nga SBP ngadto sa BAP-Samahang Basketbol ng Pilipinas, Inc. ug hinuon gi-ila kini isip SBP lang ug wala na ilakip ang ngalan nga BAP. - Gabby G. Malagar (BANAT NEWS)