CEBU, Philippines - Nahanaw ang damgo sa Sugbuanong si Rodel Mayol nga masakmit ang WBO lightweight title, human siya gipilde ni Puerto Rican champion Ivan Calderon sa usa ka seventh round split decision sa ilang rematch kagahapon didto sa Coliseum Jose Miguel Agregalot sa Puerto Rico.
Si Calderon kinsa nilupig og puntos ni Mayol, 68-65, 68-65, 65-68, nipakita sa iyang kahanas sa footwork ug counter punching aron mopatigbabaw batok sa Pinoy challenger.
Sama sa una nilang panagsangka nga nisangpot ngadto sa draw, subling gihunong sa referee ang away human nagisi na usab ang agtang sa beteranong si Calderon tungod sa accidental headbutt.
Sa sayung bahin sa ilang away, gituman ni Mayol ang ilang plano ni Freddie Roach nga pauwanan og kinumo ang Puerto Rican, apan si Calderon migamit sa iyang pabor sa kasinatian aron mapakgang ang dautang laraw sa Pinoy fighter.
Giangkon hinuon ni Calderon sa usa ka interbiyu human sa ilang away nga maisip niya si Mayol nga usa sa mga lisud nga kontra nga iyang naatubang ibabaw sa ring ug bilib siya sa gipakitang abilidad sa Pinoy fighter sa ilang away.
Ang Puerto Rican champion pabilin gihapong walay pilde sulod sa 34 niya ka away, samtang si Mayol natagak karon sa rekord nga 25-4-1, 19KOs. - Lemuel P. Maglinte (BANAT NEWS)