Sinukmagay sa Gaisano Country Mall

CEBU, Philippines - Tigian na ang una sa duha ka hut-ong sa September leg sa Summit Natural Drinking Water Amateur Series fight night karong gabii diha sa Gaisano Country Mall carpark sa Banilad.

Ang Flores Boxing Club (FBC) nga maoy nanghawod sa Mayor Jonas Cortes Amateur Boxing at the Park niadtong miaging semana, naglaum nga madominar gihapon nila ang maong away   batok sa mga nagkalain-laing boxing club dinhi sa Sugbu.

Lima ka boksidor nga mobandera alang sa FBC mao sila si Ariel Sibay sa 25 kgs., Melmark Dignos ug Junreil Jecong sa 30 kgs., Mark Kevin Sorenio sa 42 kgs. ug Charlie Pudol, kinsa mo-away sa 57 kgs class.

Sa laing bahin, ang Cabancalan adunay upat ka boksidor, usa ka elementary ug tulo sa high school.

Ang Talamban ug Philippine-Australian Boxing Club adunay tulo ka boksidor matag usa, samtang ang Pit-os, Banilad, Alang-alang, Zamboanga, Apas, Butuan ug Pit-os adunay tag-usa ka boksidor. – BANAT NEWS