CEBU, Philippines - Magbugno na ang mga kukhang University of San Jose-Recoletos (USJ-R) Jaguars ug ang University of Southern Philippines Foundation (USPF) Panthers karong adlawa sa pagpadayon sa 9th Cebu Schools Foundation Inc. (CESAFI) diha sa Cebu Coliseum.
Tumong karon sa Jaguars ang pagtumba sa Panthers aron molayat kini sa ikatulong dapit sa liderato.
Suwayan sab sa Southwestern University (SWU) Cobras pagbugto ang ilang duha ka sunod-sunod nga pilde sa dihang ilang atubangon ang Cebu Institute of Technology (CIT) Wildcats.
Sa secondary matches, ang Sacred Heart School-Jesuits (SHS-J) Eaglets makigtigi batok sa University of San Carlos (USC) Baby Warriors, samtang ang Baby Jaguars gituhoang mologlog sa dinaog-daog nga Cebu Eastern College (CEC) Dragons.
Ang Jaguars nahimutang karon sa ikatulo sunod sa University of Cebu (UC) Webmasters ug University of the Visayas (UV) Green Lancers.
Ang Jaguars mosandig sa ilang mga starters nga naglakip nilang Edwin Bibera, Kurt Amores ug Edmar Pateño. Maghangad sab sila sa suporta nilang Marvin Duran, Jerome Villaver, Medjet dela Rama ug Abulaiz Suliman.
Samtang ang Panthers magsandig sab nila ni Ellison Rivera, Elwin Durano, Fritz Dajalos, Nuevo-Demo Fileteo, Randy Avila ug Dennis Tabada. – BANAT NEWS