Lawaan Nat'l HS milangkat sa titulo

CEBU, Philippines - Gilabhan sa Lawaan National High School ang Tabunok National High School, 84-74 aron pagsakmit sa korona sa Talisay City Inter-Secondary Basketball Tournament didto sa Talisay City Sports Complex sa Poblacion, dakbayan sa Talisay.

Wala kapugngi si Jefferson Piquero sa iyang pagpangatake aron pangulohan ang Lawaan, kinsa milabaw og kuwatro puntos sa halftime, 38-34.

Aron hingpit nilang makuha ang korona, ang Lawaan milusad og 10-2 nga rally aron palawman ang lubong ngadto sa 11 puntos pag-entra sa final quarter sa iskor nga 60-49. Nakontrolar sa Lawaan ang ilang double digits nga labaw hangtod na sa pagkahurot sa oras sa duwa.

Si Piquero mirehistro og 20 puntos, gisundan nila ni Cadic Pasignajen ug Marte Lasola nga miabuno og 16 puntos matag usa.

Ang runner-up nga Tabunok gipangulohan sab Joshua Dela Cerna, kinsa miburak og 38 puntos apan wala kini makapadaog sa iyang koponan. 

Si Ian Pepito mitunol og 12 puntos, samtang sila si Jhunrex Pacana ug Jovie Torreon mitampo og nuybe puntos matag usa.

Puntos Matag Usa

Lawaan (84) - Piquero 20, Pasignajen 16, Lasola 16, Lastimosa 10, Callora 10, Taboada 8, Caparida 4

Tabunok (74) - Dela Cerna 38, Pepito 12, Pacana 9, Torreon 9, Mabunay 4, Arevalo 2. – BANAT NEWS