CEBU, Philippines - Gidominar sa mga boksidor sa Flores Boxing Club (FBC) ang labing ulahi nga leg sa Mayor Jonas Cortes Boxing at the Park diha sa Mandaue City Plaza Square sa dakbayan sa Mandaue.
Upat sa unom ka protagonista sa FBC ang nidaog batok sa agrisibo usab nga mga kaatbang gikan sa Philippine-Australian Boxing Club (PABC).
Si Jerry Soreno Jr. maoy miduslit sa kadaugan sa FBC pinaagi sa pag-iskor og 2-1 batok ni Exel Mogar sa 20 kgs. class, samtang si Melmark Dignos milansang og 3-0 batok ni Jeffrey Stela sa 30 kgs. division.
Mirehistro sab og 2-1 nga kadaugan si Uelmark Dignos batok ni Jason Tunaao sa 39 kgs., apan si Juan Aparege maoy mikulit og impresibong kadaugan dihang iyang gipaundang si Jundel Siaton sa 38 segundos sa ikatulong hugna sa ilang 54 kgs. nga sangka.
Nakabawos ang FABC sa ilang mga kapildihan ngadto sa FBC kortesiya nilang Kent Mike Tuñacao ug Miguil Semblante.
Si Tuñacao mipukgan ni Ariel Sibay, 2-1 ubos sa 25 kgs. division, samtang si Semblante mimakmak ni Junreil Jecong, 3-0 sa 30 kgs.
Lain pang nidaog sa kampo sa PABC mao sila si Richard Rama batok ni Ramel Casanare sa 25 kgs. ug Roldan Asero batok ni Robert Etorma sa Sibonga sa 60 kgs. division. – BANAT NEWS