LLBA Lapu-Lapu nakalingkawas sa LLBA Sta. Rosa

CEBU, Philippines - Nakaipsot ang LLBA/Lapu-Lapu atol sa ilang pagpanulong didto sa balwarte sa LLBA/Sta. Rosa bitbit ang 108-104 nga kadaugan sa ilang exhibition game didto Sta. Rosa, usa sa mga isla sa Mactan.

Ang LLBA/Lapu-Lapu ni coach Billy Nadado maoy nikontrolar sa tibuok duwa ug ilang gitapos ang halftime sa iskor nga 56-38.

Bisan pa niini, wala mahubsi sa paglaum ang LLBA/Sta. Rosa ug sa paningkamot nilang Ken Daño ug Jude Alibong nahulga ang LLBA/Lapu-Lapu dihang ila kining gilupig og pinuntosay sa third quarter, 37-23 aron malaslasan ang labaw ngadto na lang sa kuwatro puntos, 79-75 paghuman sa maong kuwarter.

Apan si coach Nadado daling nakahimo og kausaban ug iyang gipahimuslan ang serbisyo sa kinakusgan niyang mga magduduwa sama nila ni Pompi Ngujo, Ram Gomez, Alan Sepe, Arnie Giganto ug Boboy Ciriaco aron itugpo og balik ang ilang labaw.

Mihulga unta og balik ang LLBA/Sta. Rosa sa nanghinapos nga bahin sa duwa, apan ulahi na ang tanan kay nahubsan kini sa oras.

Si Ngujo maoy topscorer sa LLBA/Lapu-Lapu nga miburak og 26 puntos, gisundan ni Gomez pinaagi sa iyang 19 puntos. Sila si Ciriaco ug Giganto mipupo og 14 puntos matag usa, samtang si Sepe miani og 10 puntos.

Ang pilderong LLBA/Sta. Rosa gipangulohan ni Daño, kinsa mipabuto og 22 puntos, samtang si Alibong miabuno og 14 puntos.

Ang maong exhibition game usa lamang sa mga kalihukan sa tinuig nga kapistahan sa ilang mahal nga patron San Agustin ug San Miguel niadtong Agosto 30.

Napahigayon kini sa paningkamot ni LLBA/Sta. Rosa chapter president Alde Igot, vice president Jun Gelig ug commissioner Retchie Eyas. Gisuportahan sab kini ni Lapu-Lapu Basketball League (LLBL) commisioner Harry Radaza, SK chairman Ayeza Ompad Quezan, Mayor Arturo Radaza ug sa iyang kapikas ug Mactan barangay captain Paz Radaza.

Naglampuson usab ang maong kalihukan pinaagi sa pagtambayayong sa LLBA/Lapu-Lapu ubos sa ilang president Alan Sepe uban ni LLBA vice president Archie Ompad, commissioner Alan Yu ug event organizer Billy Nadado. 

PUNTOS MATAG USA

LLBA/LAPU-LAPU (108) - Ngujo 26, Gomez 19, Ciriaco 14, Giganto 14, Sepe 10, Amodia 6, Dignos 4, Daluz 4, Augusto 2, Lamoste 2

LLBA/STA. ROSA (104) - Daño 22, Alibong J. 14, Dizon 12, Amorin 12, Ybañez 10, Alibong T. 9, Mendoza 8, Igot 8,Taneo 2    (Yoyo R. Abayan)    (BANAT NEWS)