Milo-Best SBP/Passerelle SHS-J, USC North naglawig

CEBU, Philippines - Ang defending champion Sacred Heart School-Jesuit (SHS-J) ug University of San Carlos-North Campus (USC-NC) mikulit sa ikaduhang sunod-sunod nilang daog aron mag-una sa tagsa-tagsa nila ka bracket sa Passerelle division sa Milo-Best SBP/Passerelle Twin Tournament diha sa USC North Campus Gym, ning siyudad.

Ang SHS-J milubong sa University of Southern Philippines (USPF), 72-31, samtang ang host team USC North mipukan sab sa igsuong koponan USC South sa iskor nga 54-46.

Nipakita usab sa ilang nindot nga labok ang University of Cebu (UC) sa labing una nilang aksiyon dihang ilang gilat-an ang Don Bosco sa iskor nga 68-26, samtang ang Don Bosco-B mibuntog sa USC-North B, 59-54.

Ang University of San Jose-Recoletos (USJ-R) nakabangon human masugamak ngadto sa SHSJ-A sa opening game dihang ilang gilupig ang Cebu Institute of Technology (CIT), 57-42 ug ang SHSJ-B nakaipsot sa SCSIT sa iskor nga  69-68.

Tungod sa maong kadaugan ang SHS-J mao karon ang nag-una sa Group A bitbit ang 2-0 nga baraha, samtang ang USC North nagtangag usab og 2-0 nga baraha sa Group B.

Ang SHS-J gisundan sa Don Bosco-B (1-0), USJ-R (1-1), USC North-B (1-1), CIT (0-1) ug USPF (0-2).

Nagsunod sa USC North-A sa Group B mao ang UC (1-0), SHSJ-B (1-1), USC South (0-1), SCSIT (0-1) ug Don Bosco-A (0-1).Sa Small Basketeers Philippines division (SBP), gisubha'g daog ang Cebu Eastern College dihang ilang gipukan ang SHSJ-B, 23-20. Ang Don Bosco mipilde sa USC North-B, 61-17.

Uban sa CEC (1-0) sa Group A mao ang defending champions USC North (1-0), USC South (0-1) ug SHSJ-B (0-1), samtang ang Don Bosco (1-0),SHSJ-A (1-0), USC North-B (0-1) ug USC South-B (0-1) maoy naglangkob sa Group B sa SBP Division.   (BANAT NEWS)