Maayong mata, natural nga abilidad

Si Ashok Kumar, usa ka respetadong sports person nga usa ka Master's Degree holder ug may Post Graduate sa Sports Management, miingon nga ang usa ka bilyarista angay magbaton og katakus sa pagsil-ip sa nagkadaiyang anggulo nga posibleng maghatag og opening sa iyang preparasyon.

Alang ni Kumar, usa ka dakung meaning ang gipasabot ni Kumar mahitungod sa good eye and natural ability. Ang buot tukion ni Kumar mao ang natural nga talento sa magdudula nga gibatonan na niya sukad sa iyang pagkahimugso ning kalibotan. Usa ka kinaiyanhon nga talento nga gasa sa Magbubuhat.

Ang maayong mga mata sa magdudula maoy magtabang niya aron makita ang mga kahigayonan nga dili makita sa ubang bilyarista. Iyang masil-ip ang mga opening nga dili dayag ngadto sa iyang kaatbang. Tungod sa maayo niyang mga mata, makahimo siya'g daghang mga paukyab ug surpresa ngadto sa iyang gikasangka nga magdudula.

Ang natural nga abilidad maoy makahimong banggiitan sa usa ka magdudula. Maingon tang gifted siya. Anaa na kaniya ang talento sa kahanas sa pagdula og bilyar sukad sa iyang pagkatawo. Ang iyang himuon aron magamit niya ang maong abilidad mao ang pagdiskubre ug pagbansay aron mapalambo niya ang maong talento. Kun ang natural nga abilidad sa usa ka bilyarista iyang dugangan gikan sa iyang makat-onan sa pagbansay ug sa lain-laing teyoriya, mosamot ang iyang kalig-on.

Ikaw, Bords, nagbaton ka ba og maayong mata ug natural nga abilidad. Maayo kun "Oo" ang imong tubag. Pero kun "Wala" ang imong tubag, dili gihapon kini babag sa imong paglampos isip bilyarista. Daku'g ikatabang ang regular practice session sa pagpalambo sa imong abilidad kun desidido ka gyud nga i-pursue ang imong hilig.

* * *

Malipayong pagbasa sa Banat News sa mga bilyarista nga kanunay magdula sa bilyaran sa Canduao, Valencia, Bohol. Adunay duha ka lamesa ang maong bilyaran nga nahimutang sa daplin sa baybayon. Salamat sa inyong suporta sa Magbilyar Ta.

* * *

(Mga sugyot ug pakisayod? Text sa 0910-8105522)- BANAT NEWS