Sonsona lalaban sa Canada

MANILA, Philippines - Sa kauna-unahang pagkaka-taon ay lalaban sa labas ng bansa si Filipino super flyweight sensation "Marvelous" Marvin Sonsona para hamunin si Puerto Rican world champion Jose "Carita" Lopez bukas sa Rama Casino sa Ontario, Canada.

Dinadala ng 19-anyos na si Sonsona, sinasanay ng ama ni world flyweight titlist Nonito "The Filipino Flash" Donaire, Jr., ang malinis na 13-0-0 win-loss-draw ring record kasama ang 12 KOs.

Kabilang sa mga naging biktima ni Sonsona ay si two-time World Boxing Council (WBC) interim champion Wandee Singwancha ng Thailand mula sa isang second-round TKO para sa bakanteng World Boxing Organization (WBO) Oriental flyweight title.

Kung may nakikita man si Lopez, idedepensa ang kanyang suot na WBO super flyweight crown sa kauna-unahang pagkakataon, na magiging bentahe niya, ito ay ang kanyang karanasan at lakas.

"He’s Filipino and has 12 KOs in 13 fights, so he has to have a strong punch," sabi ni Lopez kay Sonsona. "But I believe that with my superior strength I will be able to impose my will on him."

Ibinabandera ni Lopez, nasambot ang bakanteng WBO super flyweight belt via unanimous decision kay Pramuansak Posuwan ng Thailand noong Marso 28, ang kanyang 39-7-2 (32 KO’s) slate.

"He’s a very technical fighter, moves very well in the ring, so I will have to look for him and I believe I will be to overmatch him due to my superior strength," ani Lopez kay Sonsona. "That’s going to be one of my keys to victory and of course my experience. (Russell Cadayona)