Slaughter suspenso

CEBU, Philippines - Bayran sa higanteng Fil-Am Gregory Slaughter og usa ka duwa nga suspenso human sa iyang unsportsmanlike foul atol  sa 79-65 nga kadaugan sa University of the Visayas (UV) Green Lancers batok sa University of Southern Philippines Foundation (USPF) Panthers sa nagpadayong 9th Cebu Schools Athletic Foundation Inc. (CESAFI) basketball event niadtong Martes sa gabii diha sa Cebu Coliseum.

Mga duwa sa Domingo(Cebu Coliseum)

1:00 pm UC vs. USJR (Jrs.)

2:30 pm SHS-J vs. DBTC (Jrs.)

4:00 pm CIT vs. DBTC (Srs.)

5:30 pm UV vs. SWU (Srs.)

Si Slaughter moserbisyo sa iyang usa ka adlaw nga suspensiyon atol unya sa ilang duwa batok sa Southwestern University (SWU) Cobras karong Domingo ug ang Green Lancers mabutang sa delikadong kahimtang.

Wala gamita ni coach Elmer 'Boy' Cabahug si Slaughter sa unang-duha ka kuwarter aron makit-an ang abilidad sa uban niyang players ug aron masuta kun unsaon nila pagduwa kun wala ang 6-foot-11 nga higante.

Gumikan niini, gipahimuslan sa Panthers ni coach Raul Latonio Sr. ang wala pagduwa ni Slaughter ug sila mao kanunay ang naglabaw hangtod sa halftime, 40-38.

Daku kaayo ang nahimong kadaut ang pag-eject ni Slaughter ilabi na nga kinahanglanon siya batok sa Cobras.

Hapit na unta matapos ang duwa diin aduna na lang kini tiwasonon nga 37.7 segundos, apan wala mahimuot si Slaughter sa paghampak kaniya ni Jordan Bardilas, ang kiat nga pointguard sa Panthers diin ang Green Lancers naglabaw, 77-65.

Dili lang kay si Slaughter ang wala makauyon sa foul lakip sab ang mga sakop sa iyang pamilya ilabi na ang iyang uyoan nga si Toto Fuentes, kinsa sakop kanhi sa Lancer.

Agi’g reaksiyon, gidam-agan ni Slaughter si Bardilas sa dughan nga diriyot makamugna og kagubot, apan si Fuentes nakigsinukmagay ngadto sa coliseum guard nga si Danny Reynes, kinsa nahiagum og garas sa walang bahin sa iyang aping.

Ang Lancers daan nang naglabaw, 79-65 human sa free throws ni Slaughter ug demalas lang kay gitawgan siya’g technical foul ug na-eject pa gyud.

Alang kang Slaughter, sobra na ang pagsige og lambos kaniya, apan alang kang Bardilas ug sa Panthers, usa lang kadto ka duty foul sa usa ka duwende nga nagdepensa sa higante.

 Igo lang naglabaw og dos puntos ang Lancers, 57-55 human sa third period, apan kalit lang miburot ang labaw human sa ilang 10-2 nga rally, 67-57 ug didto wala na nila hatagi’g higayon nga mosikit pag-usab ang Panthers.

Si Chris Victor Diputado maoy nangu sa Lancers sa iyang 15 puntos ug si Christian Rez midugang og 11 puntos aron pagbusdak og 4-1 nga baraha, samtang ang pilderong Panthers nagtangag og 1-5 nga baraha.

Sama sa miaging mga duwa, nahugno na sab ang Panthers sa fourth period nga pabiling usa ka misteryong walay kasulbaran.

Si Fritz Dajalos mihipos og 14 puntos aron pangulohan ang Panthers, gisundan nilang Ellison Rivera, Randy Avila ug Nuevo-Demo Filoteo nga adunay 10 puntos matag usa.

Sa sayo pa, si Francisco Arong Jr. mipabuto og 23 puntos ug sila si Gerald Legarde ug Glennson Ybañez nagkumboya og 33 alang sa UV Baby Lancers, kinsa mitumba sa University of San Jose-Recoletos (USJ-R) Baby Jaguars sa iskor nga 84-78.

Ang Baby Lancers, mipahiluna sa ikaduhang dapit bitbit ang 5-1 nga baraha, sunod sa walay pildeng University of Cebu (UC) Junior Webmasters nga adunay 5-0.

Puntos Matag Usa

Unang duwa:

UV (84) - Arong 23, Legarde 17, Ybañez 16, Mendoza 12, Quilaton 4, Brigoli 4, Pero 2, Suan 2, Navaja 2, Marata 2

USJ-R (78) - Trozo 14, Escatron 14, Senining 13, Muñez 13, Autentico 9, Montecillo 7, Alob 2 

Ikaduhang duwa:                

UV (79) - Diputado 15, Rez 11, Slaughter 10, Calo 9, Cincoflores 8, Lao 6, Manigque 6, Cabahug 4, Lasala 4, Dennison 2, Silva 2, Olivares 2

USPF (65) - Dajalos 14, Rivera 10, Avila 10, Filoteo 10, Linao 6, Durano 5, Tinoy 4, Bardilas 4. – BANAT NEWS