Amit nanawagan sa PSC tungkol sa allowance

MANILA, Philippines - Umaasa si lady cue artist Rubilen Amit na muling ibabalik ng Philippine Sports Commission (PSC) ang kanilang monthly allowance para masuportahan ang kanilang pagsasanay.

Ayon kay Amit, ang kanyang major sponsor na si sportsman/businessman Aristeo “Putch” Puyat ang sumasagot sa kani-lang monthly allowance.

“Up to now wala pa rin ka-ming monthly allowance and we’re just really fortunate that Mr. Putch Puyat is always there to help us,” wika ni Amit, isang three-time gold medal winner sa Southeast Asian Games.

Bukod sa ilang international tournaments, pinaghahandaan rin ni Amit ang darating na 25^th Southeast Asian Games sa Laos sa Disyembre.

“I hope na maibalik na sa amin ‘yung monthly allowance namin kasi nahihiya na rin kami kay Mr. Puyat dahil sa sobrang kabaitan niya sa amin,” ani Amit, kasama sina Iris Ranola at Maryanne Basas sa national team.

Kamakailan ay nagtungo si Amit sa Malacañang para sa isang courtesy call kay Pangulong Gloria Macapagal-Arroyo kung saan siya pinarangalan sa pagrereyna sa 2009 Women’s World 10-Ball Championship na idinaos sa Skydome sa SM North Edsa sa Quezon City noong Hunyo.

Halos wala pang limang minuto ang itinagal ng pakikipag-usap ni Amit sa Presidente.

“Iyong words niya was enough kumbaga para maging worthwhile lahat and ‘yung appreciation niya at pag-recognize nya sa nakamit natin was more than enough for me,” sabi ni Amit.

Tinalo ni Amit si two-time 9-ball queen Chin Min Liu ng Taiwan, 10-4, sa finals ng nasabing torneo na naglatag ng premyong $20,000 at nilahukan nina Kelly Fisher ng Great Britain, Jasmin Ouschan ng Austria, Jeanette Lee ng USA, Shanelle Loraine ng Guam, Yu Ram Cha ng Korea at ang pamosong si Allison Fisher.

“That five minutes, although medyo maikli lang kung iisipin, but for me it was quite an experience na to be given time by the President,” ani Amit. (Russell Cadayona)