CEBU, Philippines - Milampos si Brian “the Hawaiian Punch” Viloria sa labing una niyang pagdepensa sa iyang IBF junior flyweight title dihang iyang gipukan ang Mexican challenger nga si Jesus Iribe sa main event sa “Island Assault” kagahapon didto sa Blaisdell Center sa Honolulu, Hawaii.
Ang Fil-American nga si Viloria kinsa mapasigarbuhong mi-away atubangan sa iyang mga kababayan didto sa Hawaii , mipatigbabaw batok ni Iribe pinaagi sa unanimous decision. Tulo ka mga hurado ang miiskor og 118-110, 117-112 ug 117-111 pabor sa Pinoy fighter.
Sa pagbagting sa kampanilya sa unang round, mi-atake dayun ni Viloria si Aribe sa lawas sa beteranong boksidor. Tungod sa iyang kapaspas, naangkon ni Viloria ang pabor sa pagpasulod sa iyang mga kinumo batok ni Iribe.
Usa ka makusog nga right hook usab ang gibuhian ni Viloria sa round 5 nga maoy nakapabarag ni Iribe, apan gipakita sa Mehikano ang iyang taas nga kasinatian sa boksing dihang dali siyang nakabawi og kusog.
Tungod sa maong kadaugan, ang Pinoy champion mipalambo sa iyang rekord ngadto sa 26-2, 15KOs, samtang ang pilderong si Iribe nikanaug sa 15-6, 9KOs rekord.
Sa supporting bout, bisan pa og wala niya napatumba ang iyang kaatbang, napakita gihapon sa ALA boy AJ “Bazooka” Banal ang iyang katakus dihang nidaog siya batok ni Jose Angel Beranza sa usa ka unanimous decision.
Ang Sugbuanong boksidor nipahagurus sa iyang mga kinumo aron gisian ang tuong kilay ni Beranza. Bisan paman og gikuhaan siya og puntos sa referee tungod sa lowblow, nidaog gihapon si Banal dihang tulo ka mga hurado ang nihatag og 99-92, 98-91 ug 98-91 pabor ni Banal.
Laing mihatag og dungog sa nasud mao si Dennis Laurente human siya mukulit og kaugalingon niyang unanimous decision nga kadaugan batok ni Zaid Zavaleta sa Mexico. – BANAT NEWS