CEBU, Philippines - Mosikad na ang labing unang Charity Fun Run nga gipasiugdahan sa Cebu Diamond Lions Club karong alas-6 sa buntag diha sa Sumilon Road sa Cebu Business Park.
Liboan ka mga runners gikan sa tulo ka kategoriya ang maginukdanay sa kadalanan.
Mga kategoriya nga tigian mao ang 3K (12 below), 5K ug 10K Masters A ug B.
Lahi sa mga naandan nga lumba, ang CDLC daan nang nipahibalo nga gibawalan nila ang pagsalmot sa mga beteranong runners hinungdan nga wala nila giapil ang open division sa maong lumba.
Tumong sa maong Fun Run mao ang paghatag og kahigayonan sa sumusulbong nga mga runners aron makapakita sa ilang abilidad.
Ganting salapi ang madawat sa top runners. Ang kampiyon mobulsa og P3,000, ang second placer makaangkon og P2,000 ug ang third placer makadawat og P1,000.
Ang maong Fun Run gimugna aron makakuha og pundo aron itabang ngadto sa mga bata nga adunay cancer ug uban pa nga mga proyekto sa Cebu Diamond Club. (Lemuel P. Maglinte) (BANAT NEWS)