CEBU, Philippines - Mag-abot na karon ang mga dekalibreng riders gikan sa nagkadaiyang dapit sa Kabisay-an aron molingaw sa mga katawhan sa pag-ulbo sa 5th Underbone Rallycross Series karong adlawa nga sugod alas-8 sa buntag diha sa South Road Properties (SRP) sa barangay Mambaling, ning siyudad.Kapin sa 100 ka mga top riders dinhi sa Sugbu ubang mga koponan gikan sa Dipolog, Dumaguete ug Bohol ang mopakita'g aksiyon karong adlawa.
Ang lumba gibahin sa duha ka kategoriya -- motocross ug underbone races.
Lima ka titulo ang ilogan sa matag kategoriya nga naglakip sa expert, novice, beginners , veterans ug special events.
Usa sa mga giatngan nga mosalmot mao ang sixth rank rider sa tibuok Asia Pacific nga si Jonjon Adlawan, kinsa mopakita'g aksiyon sa expert ug special event divisions.
Si Edsel Odulio, race director, nagkanayon nga haom ang SRP nga himuon isip race track tungod sa batoon nga dalan niini nga maoy makahatag og dugang hagit alang sa mga riders.
Ang kampiyon sa expert division mobulsa og P5,000, samtang ang modaog sa novice ug special events makadawat og P2,500 ug ang kampiyon sa beginners makaangkon og P2,000.
Ang maong torneyo gipasiugdahan sa PTT Lubricants Philippines uban
sa suporta sa Evvolve Marketing. (BANAT NEWS)