CEBU, Philippines - Nahugno ang tibuok kahugpongan sa PBA human nagmakuli ang top overall rookie pick nga si Japeth Aguilar pagpirma sa iyang kontrata ngadto sa Burger King Whoopers aron moduwa sa umaabot nga season sa labing dakung liga sa nasud nga buksan karong Oktubre.
Si Aguilar, kinsa gihulagway nga mao ang mamahimong labing dominanteng higante sa PBA, mag-atubang karon og "lifetime ban" human sa kontrobersiyal niya nga pagbalibad sa gitanyag nga kontrata sa Whoopers nga maoy nikuha kaniya sa miaging 2009 Rookie Draft niadtong Agosto 2.
Si Burger King team manager Lito Alvarez nagkanayon nga ilang gitanyagan ang 6-foot-10 forward og tulo ka tuig nga kontrata, apan nagmakuli si Aguilar pagdawat niini.
Gumikan niini, mihulga ang Burger King nga ipasaka nila kini ngadto sa PBA Board aron maoy mohukom unsay silot nga ipahamtang ngadto ni Aguilar.
Hinuon, ang RP-Smart Gilas team sa Samahang Basketbol ng Pilipinas (SBP) andam nga mosagop ni Aguilar aron motabang sa ilang kampanya sa umaabot nga 2012 London Olympics.
Sa laing bahin, ang kampo ni Aguilar midepensa nga ang pagdumili nila pagdawat sa kontrata aron moduwa sa Whoopers, mao ang limitadong oras nga gihatag ni coach Yeng Guiao sa miaging 25th FIBA-Asia men’s basketball championship didto sa Tianjin, China.
Si Guiao, kinsa maoy migiya sa RP Team sa miaging torneyo maoy coach sa Whoopers. (Lemuel Maglinte) (BANAT NEWS)