Summit Boxing sa Country Mall

CEBU, Philippines - Napulo'g duha (12) ka paresan ang magbinukbukay alang sa final leg sa bulan sa Agosto sa Summit Natural Drinking Water Amateur Boxing Series karong gabii diha sa Gaisano Countrymall carpark sa Banilad.

Ang Sanai Boxing Club ug ang Cabancalan Boxing Team maoy daghang boksidor nga gipaduwa sa maong torneyo. Ang duha sa mga inilang amateur boxing club nipadala og lima ka boksidor matag usa.

Misalmot usab ang mga boksidor gikan sa Pit-os, Bogo, Talamban, Consolacion, Pilit, Alang-alang, Apas, Zamboanga ug Balamban.

Usa sa mga giatngan sa maong torneyo mao ang kumbati sa duha ka amateur aspirants nga sila si Angelu Capta ug Reycon Lumilis nga magsangka ubos sa 33 kgs. class. Ang duha ka boksidor walay koponan nga gipasilongan. - Lemuel P. Maglinte (BANAT NEWS)