Cebu City Fire Station South District nanghawod sa chess tilt

CEBU, Philippines - Wala kapugngi ang pagmangtas sa Cebu City Fire Station South District (CCFSSD) ug maoy naghari sa tinuig nga BFP-7 Regional Chess Team tournament nga natapos dili pa lang dugay.

Napuhalan sa CCFSSD ang laing pito ka lig-ong koponan human sila mihipos sa kinatibuk-ang 23 puntos.

Ang Office of Provincial Fire Marshal Cebu North maoy mi-okupar sa ikaduha nga adunay 16.5 puntos.

Sa laing bahin, ang Negros Oriental Province nalandig sa ikatulo nga mihipos og 15 puntos.

Mikompleto sa mananaog mao ang Regional Director's Office ug Bohol Province nga pulos nakakuha og 12.5 puntos, Mandaue City Fire Station (10.5 points), Office of Provincial Fire Marshal South District (9 points) ug Cebu City Fire Station North District (5 points).

Gawas sa team event, si Frankline Caylan ug si Winston Neri sa Cebu City Fire Station South District milangkat sa ilang individual board assignment titles human giharos ang pito ka duwa sa eliminasyon diin miposte kini og 6.5 puntos matag usa.

Ang ilang kauban nga si Paul Rodriguez mitampo og sayes puntos alang sa champion team nga niduwa sa board three, samtang si Antonio Ortiz sa Official of Provincial Marshal Cebu North maoy bugtong nakabarog sa tigiay sa board four.

Ang maong chess team competition gipadagan ni Bob Tojong. –BANAT NEWS