CEBU, Philippines - Walay puangod nga gipanitan sa bangis nga University of San Carlos (USC) Baby Warriors ang Don Bosco Technology Center (DBTC) Baby Greywolves, 92-77 sa ilang panag-abot sa 9th Cebu Schools Athletic Foundation Inc. (CESAFI) basketball event kagabii diha sa Cebu Coliseum.
Sa maong kadaugan, ang Baby Warriors nagsolo na karon sa ikaduhang dapit sa ilang 3-2 nga baraha.
Mikiat dayon ang Baby Warriors pagsugod ug ilang gitapos ang first period pinaagi sa pagposte og 33-18 nga bentaha.
Tungod sa padayong pagpanginit sa mga kamot ni Ahien Kikuchi namentinar sa Baby Warriors ang ilang 15 puntos nga labaw sa halftime, 36-51.
Naguba ang game plan sa Baby Greywolves sa ikatulong kuwarter dihang tulo sa ilang mga magduduwa ang gibikogan ug wala na makagukod sa bangis nga Baby Warriors, kinsa miinat sa ilang labaw ngadto na sa 18 puntos, 66-48 paingon na sa final period.
Bugtong konsuylo sa Baby Warriors mao ang pagkitkit sa labaw ngadto na lang sa 13 puntos human sa duha ka free throws ni Jose Marlo Pono.
Si Anthony Gai Romaguera maoy topscorer sa Baby Warriors uban ang 21 points. Si Francis Dave Guardario miabuno og 14 puntos, samtang si Kikuchi mitimang og 10 puntos alang sa Baby Warriors.
Ang Baby Greywolves, kinsa mitangag og 0-4 nga baraha, gipangulohan ni Kyle Esbra pinaagi sa iyang 21 puntos, gisundan ni Chris Daryl Yap nga adunay 14 puntos.
Puntos Matag Usa
USC (92) - Romaguera 21, Guardario 14, Kikuchi 10, Palapar 9, Omolon 7, Malana 6, Bacaltos 4, Bongo 4, Lora 4, Juariza 3, Dalangpan 3, Rabuya
DBTC (77) - Esbra 21, Yap 14, Balorio 8, Alburo 7, J. Ruiz 7, Empenio 6, Pono 5, L. Ruiz 4, Castillo 2, Bastes 2, Tigullo 1. –BANAT NEWS