CEBU, Philippines - Mopasiugda ang Cebu Normal University (CNU) sa ilang labing unang Alumni Fun Run nga ulohan og "Run A Normal Life" nga gikatakda karong Septiyembre 13 nga manukad diha sa CNU ground.
Liboan ka runners ang gipaabot nga mosalmot sa maong lumba nga sugdan sa alas-5:30 sa buntag.
Ang lumba gibahin ngadto sa tulo ka kategoriya - 3K (12 paubos), 5K (Alumni) ug 10K (Open).
Si Danny O. Eraño, usa sa mga organizers nagkanayon nga lakip sa managan mao ang ilang mga estudyante gikan elementarya, sekondarya ug ingon man sa kolehiyo.
Ang makampiyon sa matag 10K open mobulsa P3,000, samtang ang makampiyon sa 5K makaangkon og P1,500. Ang modaog sa 3K makadawat og gift packs.
Ang registration fee nagkantidad og P200 alang sa 5K ug 10K ug P150 sa 3K, alumni ug estudyante sa CNU. Ang deadline sa registration kutob lamang karong Septiyembre 5 diha sa CNU Balay Alumni ug sa Cebu City Sports Center.
Alang sa dugang mga impormasyon, mahimong motawag ni Eraño sa numero 518-1363 o 0921-3683227. - Lemuel P. Maglinte (BANAT NEWS)