5th Inter-BPO Caging Eperformax sud na's quarterfinals

CEBU, Philippines - Mi-rally ang Eperformax sa third period nga maoy gihimo nilang hinagiban pagbuntog sa Lexmark, 62-54 aron paglukat og pasaporte sa quarterfinals sa 5th Inter-BPO Basketball Championship niadtong Sabado diha sa City Sports Club-Cebu gym sa Cebu Business Park.

Unang miarangkada ang Lexmark ug miposte kini'g 14 puntos nga bentaha paghuman sa unang 10 minutos sa duwa, 19-5, apan mitibugsok ang ilang labaw ngadto sa 10 puntos sa halftime, 30-20.

Ang Eperformax hinay-hinay nga miabuno sa buslot nilang depensa inubanan ang 23-5 nga rally sa ikatulong kuwarter aron ilogon ang labaw, 43-35 paingon na sa final period.

Si Raymond Dennis Tan mirehistro og team-high 17 puntos alang sa Eperformax, kinsa moharong sa Aegis People Support sa sunod nga round.

Sa laing aksiyon, ang Qualfon mibuntog sa twice-to-beat Convergys sa ilang quarterfinal showdown sa iskor nga 58-45.

Ang duha subling mag-abot sa tinaktakay nga duwa diin ang modaog maoy moabante sa semifinal.

Si Jopher Regidor miligwat og 13 puntos, samtang sila si Glenn Mangubat ug Benjamin John Sanchez nagkumboya og 22 puntos.

Ang pilderong Convergys gipangulohan ni Marc Pajo pinaagi sa iyang 14 puntos.

Puntos Matag Usa

Unang duwa:

Eperformax (62) - Tan 17, Visoc 9, Agua 8, Boncalon 8, Gabisay 6, Sayre 5, Nebria 4, Helvano 3, Arrieta 2

Lexmark (54) - Morin 17, Torrepalma 12, Villaluz 10, Chiong 4, Vallega 3, Sabuga 2, Obeso 2, Quilaton 2, Villahermosa 2

Ikaduhang duwa:

Qualfon (58) - Regidor 13, Mangubat 12, Sanchez 10, Redulosis 6, Borgonia 6, Llesol 6, Caballero 3, Andone 2

Convergys (45) - Pajo 14, Codilla 8, Esteban 6, Delapena 4, Goricho 4, Sugatan 4, Ngo 3, Villarin 2. - Yoyo R. Abayan (BANAT NEWS)