DBTC miharos sa elims
CEBU, Philippines - Nakompleto na ang upat ka alas nga moduwa sa semifinal sa secondary division sa 2009 Cebu Schools Athletic Foundation Inc. (CESAFI) football event dihang giharos sa defending champion Don Bosco Technology Center ang elimination round.
Ang DBTC miangkon sa ilang katapusang daog sa eliminasyon human sirohi ang University of San Jose-Recoletos, 12-0 diha sa kaugalingon nilang nataran.
Dobleng kapildihan ang naangkon sa USJ-R human sila miyukbo ngadto sa University of Southern Philippines Foundation (USPF), 2-5.
Ang DBTC miabante sa sunod hugna bitbit ang 4-0 nga baraha, samtang ang USPF nalandig sa ikaduha sa ilang 2-1-1 win-loss-draw. Ang USPF nakatabla uban sa Sacred Heart School-Jesuits (SHS-J) sa ilang qualifying phase.
Ang SHS-J miangkon sa ikatulo nga dapit, samtang ang USJ-R napunta sa ikaupat.
Ang semifinals himuon karong Sabado diha sa University of San Carlos (USC)-Technological Center field sa Talamban. (BANAT NEWS)
- Latest
- Trending
