Tutyo baraha ni Eala

Tungod sa kadaghan nako og amigo nga atong matawag nga mga eksperto sa basketball, taudtaud akong nagpakahilum niining padayon ug daw sa wala’y kataposan ug wala’y kamatayon nga kontrobersiya tali sa SBP ug BAP ilabi na kay kini usa ka dakong legal issue diin wala kinahanglana ang akong komentaryo.

Apan dihang nabaniog nga buot linglahon ni Noli Eala ang mga sportwriters dinhi sa Sugbo, natandog ang akong garbo ilabi na kay ako man maoy nag-cover sa nagpadayong CESAFI nga usa sa mga inilang lega nga gipangulitawhan sa SBP.

Dili unta ako angayan nga manghilabot niini ilabi na kung ang tumong ni Eala ug mga kadagoan sa SBP ubos ni Manny V. Pangilinan naghatag og kaayohan sa basketball.

Kagahapon, ako gyud gihagoan og basa pag-usab ang pito ka pahina nga desisyon gikan sa FIBA Special Commission for the Philippines nga migawas kaniadtong Hulyo 22, 2009 human sa usa ka buwan nga gihimo ang FIBA Congress didto sa Geneva, Switzerland kaniadtong Mayo 21-22, 2009.

Ug didto ako gyung nasuta nga sa no.1 nga linya ubos sa page 4, nasuko pa gani ang FIBA Special commission nganong ang upat ka taga SBP wala man makasugat og problema paglukat og visa sa Swiss Embassy samtang ang BAP walay bisan usa sa BAP nga nakukuha’g visa. Nagduda hinuon ang BAP nga may maniobrang gihimo didto sa Swiss Embassy.

Ang pinakabug-at nga desisyon sa FIBA Special commission adto nato mapalgan sa no. 4 sa page 7 nga nagkanayon: As a final note, the Special commission reminds the parties of its mission which is to mediate between the parties .” However, mediation was rendered impossible in the absence of one of the parties.” So unsa may buot ipasabot niana? Tungod kay wala man didto ang BAP, dili mahimong husayon. Gidugang pa gyud didto nga “The settlement proposed by Mr. Villafuerte (Rep. Luis R. Villafuerte) in his letter dated July 20, 2009 was thus not entertained.”

Unsa may buot pasabot sa SBP nga wala man nila ipakita ang kinatibuk-ang pito ka pahina sa desisyon sa FIBA? Tuyo ba nilang isulod kitang tanan sa pukot alang sa ilang kaugalingon interest? Nagpasalamat ako ni CESAFI commissioenr Felix O. Tiukinhoy nga giapilan niya ako pag-email sa decision sa FIBA kay mura unta ako og irong buang magsige'g panaway sa BAP nga walay kalibotan sa issue.

Ang mipirma sa maong pito ka pahina mao sila si FIBA chairman Dr. Borislav Stankovic ug mga membro nga sila si Dr. Carl Men KyChing ug Mr. Ken Madsen.

Karon, nabunggo gyud ang tuyo ni Eala sa pagsuway niya’g ilad sa Cebu media kay tulo raman diay ka pahina ang iyang gi-print out ug maoy iyang gipang-apud-apod.Dili sab ako motuo nga nahutdan og tinta ang printer o nahutdan ba hinoon og bond paper ang SBP.

Makadayeg unta kita sa kalantip sa pangutok ni Eala apan kung sa daotang paagi kini niya gamiton, dili sab tingali maayong magpadayon siya diha sa SBP gawas lang og ‘untouchable” kini si Eala. Daku-dako’g bayranan kini si Eala kay kung sa piyat-piyat pa kini, hastang tutyoa sa iyang straight kay kuwang og duha ka baraha aron makumpleto ang lima ka numero ug hasta ang baraha sa uban nga nabungkag iya pa gyung bayran.

Labaw pang nakadayeg sab ako sa kaisog ug sa pagka-mainantoson nila ni Rep.Villafuerte ug Rep. Prospero Pichay sa panglimbasog aron dili yatakyatakan ang ilang katungod.

Nahisgotan sab sa FIBA Special Commission ang pagsalikway sa SBP sa 60 ka sakop sa BAP nga unta ang giilang ngalan mao man ang BAP-Samahang Basketbol ng Pilipinas. Wala sab tumana sa SBP ang representation sa matag grupo nga 12 ka sakop alang sa SBP ug 12 ang gikan sa BAP ug ang ika-25 nga si Pangilinan maoy chairman.

Unsaon man nato niini kung ang atong mga sports leaders nga atong gitamud dili man gani motug-an sa tinuod? Mas maayo pa tingaling usbon nato ang ngalan sa SBP ngadto sa “Sa Bakak Patuohon.”

Sa pagka karon, wala pa makahukom ang CESAFI kung asa sila modapig aning duha ka grupo kay neutral ang ilang baruganan hangtod mahukman sa korte kung kinsa’y ilhon nga lehitimong national sports association nga modumala sa basketball.

SGMiscellaneous. Congrats to Dr. Boy Te and his Lai Garden team for winning the 9th GAA Founder’s Cup title last Sunday, August 16 against the Aqua Serv Mineral Water at the Guadalupe Sports Complex. Belated birthday greetings to Micaela Medalle of barangay Punta Princesa who turned six years old last August 21 and to her uncle Jimmy who turned 31 yesterday. I had a minor problem with PLDT last Monday about its offer to avail free DSL sim pack for landline extension which will cost me addtional P250 monthly to my telephone bill whether or not I will use the sim. That afternoon, the problem was immediately settled and thanks to Mr. Ramir Pedroza of counter 7 at the Jones Avenue office for accepting my explanation that I had miscommunication with the sales agent/broker. -  BANAT NEWS